وروستی
د چاپېریال اونۍ په مناسبت، د چاپېریال ساتنې ملي ادارې عمومي رئیس پیغام
بسم الله الرحمن الرحیم
د چاپېریال اونۍ په مناسبت، د چاپېریال ساتنې ملي ادارې عمومي رئیس پیغام
قدرمنو هېوادوالو!
د چاپېریال ساتنې ملي ادارې ټولو همکارانو په استازیتوب، د غبرګولي ۱۵مه چې د چاپېریال نړیواله ورځ ده، ټولو ته مبارکي وایم.
دغه مهم نړیوال مناسبت زموږ لپاره یو ښه فرصت دی؛ ترڅو وکولای شو د چاپېریال پر اهمیت ښه وپوهېږو او د یو ټولنیز مسوولیت، چاپېریال او طبیعي ارزښتنو د ساتنې لپاره لاسونه یو کړو.
وروڼو او خویندو!
د چاپېریال ساتنې ملي ادارې د یوه مسوول ارګان په توګه هڅه کړې چې له چاپېریالي ګواښونو سره مقابله وکړي او د تقنیي اسنادو په چمتو کولو سره د یوه سالم چاپېریال جوړولو، له خلکو او اړوندو ادارو سره د ګډې همکارۍ په رامنځته کولو سره د هېواد د طبیعي ارزښتونو او چاپېریال څخه ساتنه وکړي.
قدرمنو هېوادوالو!
ټولنیزه پراختیایي، اقتصادي او فرهنګي وده هغه مهال ممکنه ده چې موږ سالم چاپېریال ولرو او له چاپېریالي ګواښونو څخه لېرې اوسو.
د چاپېریال نړیوالې ورځې په مناسبت چې سږ کال ژوند بڼو ته ځانګړې شوې د هېواد څلور ارزښتناکه سیمې، د غزني ناور دښته، د تخار درقد ولسوالي، د کندز امام صاحب او نورستان ولایت د لازمو مطالعاتو وروسته د ساتل شویو سیمو په توګه اعلانوو.
موږ ۱۳۹۹ کال د چاپېریال ساتنې لپاره د خلکو او دولت د ګډو همکاریو په نوم نوموو او په دې برخه کې له ټولو هېوادوالو، مدني ټولنو، رسنیو او نړیوالو موسسو څخه د همکارۍ جدي غوښتنه کوو.
شاه زمان میوندي
د چاپېریال ساتنې ملي ادارې عمومي رئیس
۱۳۹۹/ غبرګولی/ کابل
د_طبعیت_لپاره_وخت