د چاپېریال ساتنې ملي ادارې عمومي رئیس د IFRC له سیمه‌ییز مشر او ورسره پلاوي سره وکتل

١٤٤٧کال د محرم الحرام ٥مه/ کابل
د چاپېریال ساتنې ملي ادارې عمومي رئیس مولوي مطیع‌الحق خالص د سره صلیب نړیوال فدراسیون (IFRC) له سیمه‌ییز مشر ښاغلي الکساندر او د افغانستان لپاره د IFRC له مسؤل ښاغلي سمیع سره وکتل.
په پیل کې د چاپېریال ساتنې ملي ادارې عمومي رئيس الکساندر او ورسره پلاوي ته ښه راغلاست او هرکلی ووایه او د افغانستان د چاپېریال ساتنې او اقلیمي بدلون په تړاو یې ورسره بحث او خبري وکړې.

نوموړي وویل افغانستان د اقلیمي بدلون له سختو اغېزو سره مخ دی. وروستیو کلونو وچکالۍ، بې وخته سیلابونو او د طبیعي پېښو زیاتوالي زموږ ټولنې له جدي ګواښونو سره مخ کړې دي. د دغو ستونزو پر وړاندې مبارزه یوازې د ملي هڅو له لارې نه، بلکې د نړیوالو همکارو ادارو په مټ ممکنه ده. موږ د IFRC په څېر بنسټونو ته اړتیا لرو ترڅو د ظرفیت لوړونې، علمي تبادلې او دوامدارو ابتکاري پروژو له لارې له افغان حکومت سره اوږه په اوږه کار وکړي.
ښاغلي خالص دا هم وویل چې د چاپېریال ساتنې ملي اداره چمتو ده له نړیوالو مرستندویه بنسټونو سره ګډې تخنیکي طرحې او پلانونه شریک کړي، ترڅو په پلي کېدو سره يې لازم اقدامات ترسره شي.

ورپسې د IFRC سیمه‌ییز مشر ښاغلي الکساندر د افغانستان له خلکو او مسؤلو ادارو سره د مرستې ژمنه تازه کړه او ویې ویل موږ د افغانستان له اقلیمي بدلون له ننګونو څخه خبر یو او دا مسؤلیت ګڼو چې د طبیعي ناورینونو د خطرونو د کمښت، د ټولنیزو زیربناوو د پیاوړتیا او د خلکو د چمتووالي لپاره له اړونده ادارو سره کار وکړو.
ښاغلي الکساندر څرګنده کړه نړیوال فدراسیون به هڅه وکړي څو د افغانستان له اقلیمي بدلون او بشري اړتیاوو سره سم د ملاتړ نوې لارې چارې رامنځته کړي او اقلیم محوره پروژې پیاوړې کړي.

په دغه لیدنه کې دواړو خواوو د طبیعي پېښو د خطرونو ارزونه او مخنیوی، د محلي ټولنو د چمتووالي د کچې لوړول، د عامه پوهاوي پراختیا، د دوامداره پرمختګ لپاره د ګډو پلانونو ترتیب او د تخنیکي ټیمونو تر منځ د همغږۍ سیستم پر جوړولو مفصل بحث ترسره کړ او پرېکړه یې وکړه چې د نږدې همکاریو، د پلانونو شریکولو او پر وخت همغږۍ له لارې به یادو اهدافو ته د رسېدو لپاره عملي ګامونه اخلي.