وروستی
د پلاستیک نه کارولو په تړاو پراخ تبلیغاتي کمپاین ترسره شو
د غبرګولي ۱۷ مه/ننګرهار
دجولای درییمه چي د پلاستیک نه کارولو نړۍوالې ورځې سره سمون لري، په همدې مناسبت د ننګرهار ولایت د چاپېریال ساتنې ریاست له خوا جلال اباد ښار کې پراخ تبلیغاتي کمپاین ترسره شو چې پکې د اصنافو او کسبګرو د اتحاديو استازو، ځوانانو او خبریالانو ګډون کړی وو.
د دغه کمپاین په ترڅ کې د جلال اباد ښار مرکز اړوند بېلابېلو ناحیو کې د لوډسپیکر له لارې د پلاستیک د نه کارولو، اضرارو او ناوړه اغیزو په هکله ښاریارنو ته عامه پوهاوی ورکړل شو.
د کمپاین په لړ کې د ننګرهار ولایت د چاپېریال ساتنې رئیس پوهنمل امین الله یوسفزي د پلاستیکي کڅوړو د کارونې پر اضرارو، په چاپېريال کې د دوی د اوږد مهال لپاره پاتې کېدو او په ترڅ کې یې د انسان، چاپېريال او حیوان ژوند ته را ولاړېدونکو ناروغیو ته په اشاره وویل: دولتي اداراې، خصوصي سکتور، هټیوال او عام خلک دې د چاپېريال ساتنې رياست سره په ګډه په دغه مهمه مبارزه کې پراخه ونډه واخلي او له همدې لارې دې د ځان او راتلونکو نسلونو ژوند خوندي کړي.
همدا راز د کمپاین په لړ کې پر ښاریانو د پلاستیک د نه کارولو په پار ۱۵۰ د عامه پوهاوي بروشرونه او ۲۰۰ ټوکرینې کڅوړې ووېشل شوې.
د یادونې وړ ده چې د ټوکرینو کڅوړو د وېشلو کمپاین به دوام ولري چې له مخې به یې د جلال اباد ښار د بېلابېلو ناحيو هټیوالو او ښاريانو ته د تکه یې کڅوړو د مرجورولو په هکله عامه پوهاوی ورکرل شی