وروستی
د اسلام د ستر پيغمبر (ص) د لمسي، حضرت امام حسين(ع) د شهادت د کليزې په مناسبت د چاپېريال ساتنې ملي ادارې د مشرتابه پيغام
عاشورا د اسلامي نړۍ يوه مهمه پېښه ده. د اسلامي ارزښتونو په بيا ژوندي کولو او ساتلو کې د دې ستر بهير رول بې سارى دى.
په همدې مناسبت؛ د چاپېريال ساتنې ملي ادارې عمومي رئیس، ځان د حسيني عزادارانو سره شريک ګڼي او د دې خونړۍ پېښې له امله ټول مسلمه امت په ځانګړې توګه افغان ولس ته تسليت وړاندې کوي.
د حسين (ع) قيام د هغو ظلمونو پر وړاندې و؛ چې د يزيدي حکومت له خوا پيل سوي وو.
په دې کې شک نه سته؛ چې د حسيني عاشورا پيغام، د اسلامي ارزښتونو د دښمنانو په وړاندې د درېدلو او مبارزې پيغام و.
حضرت امام حسین (ع) د ځان او کورنۍ په قربانولو د حق او عدالت په لار کې د قربانۍ او شهادت يو نوى باب پرانيستى او د حق د لارې لارويانو ته يې وښودله؛ چې د ظلم او ستم په وړاندې بايد ځان تسليم نه کړي.
يو ځل بيا د امام حسين د شهادت د کليزې له امله د نړۍ ټولو مسلمانانو ته تسليت وړاندې کوم او د ستر څښتن له درباره غواړم؛ چې د دې ورځې ټول مراسم د امنيت په فضا کې تر سره سي.
په درنښت
شاه زمان ميوندي
د چاپېريال ساتنې ملي ادارې عمومي رئیس
کابل - د ۱۳۹۹ عاشورا