وروستی
د چاپېریال ساتنې ملي ادارې عمومي رئیس د کندهار ولایت له صنعتکارانو سره وکتل
۱۳۹۹د وږي۲۳مه، کندهار
د چاپېریال ساتنې ملې ادارې عمومي رئیس شاه زمان میوندي او ورسره پلاوي د کندهار ولایت په مقام کې د کندهار د صنایعو او کانونو، کرهڼې او مالدارۍ او سوداګریزو خونو له مسولینو، ښځو او صنعتکارانو سره وکتل.
د غونډې په پیل کې د چاپیریال ساتنې ملي ادارې عمومي رئیس شاه زمان میوندي له پانګوالو مننه وکړه، چي په هېواد کې له شته ناخوالو سره سره د هیواد د اقتصادي ودې په موخه په هیواد کې دننه پانګونه کوي او د همدې ترینګلي حالت په اوږدو کې خلکو ته د کار زمینه مساعده وي، ده زیاته کړه: صنعت د یوه هېواد اقتصادي وده پر پښو دروي او د یوه هېواد د اقتصادي ودې د پراختیا سبب کېږي؛ خو د دې تر څنګ صنعت کاران باید د یوه ښه چاپېریال د درلودولو لپاره هم کار وکړي، د چاپېریال د ککړتیا سبب نه شي تر څو د اقلیمي بدلون لپاره بد ثابت نه شي، ده په دې تړاو په هېواد کې ورستیو راوتلو سېلابونو ته ګوته ونیوه او غوښتنه یې وکړه چې د صنعتي پارکونو د زرغونیتا تر څنګ دې د کندهار ښار د زرغونتیا په برخه کې هم هڅې وشي، تر څو راتلونکو نسلونو ته یو خوندي او پاک چاپېریال په میراث پاتې شي.
ورپسې د کندهار ولایت مرستیال والي فیصل شیرزي صنعتکارانو ته ډاډ ورکړ، چې د سوداګرو او صنعتکارانو د پانګونې په برخه کې، امنیت، غوره چاپیریال او د شته اسانتیاوو برابرول د حکومت دنده ده او په دې برخه کې به ولایتي اداره د تل په څېر هر اړخیزې هڅې کوي؛ تر څو سوداګرو او صنعتکارانو ته خوندي چاپېریال رامنځته کړي.
د ناستې په اوږدو کې ګډونوالو د صنعت پر وړاندې د پرتو خنډونو، چاپېریالي جوازونو د اخیستو په برخه کې د اسانتیا د رامنځته کولو، د ښځینه صنعتکارانو لپاره د کره او غوره ځای پر برابرولو او ځينو نورو مسایلو خبرې اترې وکړې او په دې تړاو یې خپل وړاندیزونه د ادارې له استازو سره شریک کړل. دوی په دې برخه کې له مرکزې ادارې غوښتنه وکړه؛ تر څو د دې ستونزې د حل لپاره په ولایتونو کې د ادارې دویمو واحدونو ته پوره صلاحیتونه ورکړي.
په پای کې ښاغلي میوندي وویل: ولایتونو ته په تریجي توګه د صلاحیتونو لېږد ادامه لري او د جوازونو تر لاسه کولو په برخه کې د پام وړ اسانتیا رامنځته شوې؛ خو لاهم په دې برخه کې هڅې روانې دي چې پانګوالو ته لا ډېره اسانیتا برابره کړو.