وروستی
د چاپېریال ساتنې ملي ادارې عمومي رئیس د کندهار ولایت له صنعتي پارکونو څخه لیدنه وکړه
د وږي ۲۴مه نېټه/ کندهار
د چاپېریال ساتنې ملي ادارې عمومي رئیس شاه زمان میوندي او ورسره پلاوي یې، کندهار ولایت ته د خپل رسمي سفر په لړ کې د وږي په ۲۴مه نېټه د کندهار ولایت د صنعتي پارکونو له بېلابیلو برخو څخه لیدنه وکړه.
د دې لیدنې هدف د چاپېریالي ستونزو او ګواښونو ارزونه او د صنعتي پارکونو په فعالیتونو کې د چاپېریالي معیارونو د پلي کولو څرنګوالی و.
ښاغلي میوندي د صنعتي پارکونو څخه د لیدنې سربېره په صنعتي پارکونو کې د چاپېریالي اصولو او معیارونو د تطبیق د څرنګوالي (د دود د تصفیه کولو له فلترونو، د زبالو او فاضلابو د لېږد) د پروسې ارزونه هم وکړه.
د چاپېریال ساتنې ملي ادارې عمومي رئیس د ټولو فابریکو له مالکینو او پانګوالو څخه وغوښتل چې په خپلو فعالیتونو کې په جدي ډول چاپېریالي قوانین او اصول مراعت کړي؛ که نه نو فابریکو ته یې د فعالیت اجازه نه ورکول کیږي.
ښاغلي میوندي د فابریکو او شرکتونو له مالکینو څخه وغوښتل چې چاپېریالي جوازونه ترلاسه کړي. ده د کندهار ولایت د چاپېریال ساتنې رئیس ته لارښوونه وکړه چې د ټولو فابریکو او شرکتونو د فعالیت د څرنګوالي ارزونه دې وکړي، د کومو فابریکو فعالیت چې د چاپېریال قانون خلاف او یا هم جواز نه لري په سمدستې ډول دې د هغو فعالیت ودرول شي؛ همدا راز ښاغلي میوندي لارښوونه وکړه: چې سوداګرو او پانګوالو ته دې اړین چاپېریالي معلومات ورکړل شي؛ ترڅو خپل فعالیتونه د چاپېریالي اصولو مطابق عیار کړي.
که څوک د چاپېریالي اصولو مطابق خپل فعالیتونه عیار نه کړي؛ نو قانوني چلند به ورسره وشي.