وروستی
په چاپېریال ساتنه او د هوا له ککړتیا سره په مبارزه کې د رسنیو په ونډه ټینګار
د لیندۍ ۱۲مه نېټه/ کابل
د چاپېریال ملي ادارې پرون ماښام د لیندۍ په ۱۱مه نېټه د ملي او نړیوالو رسنیو له مسوولینو سره د چاپيریالي موضوعاتو ، له هواککړتیا سره د مبارزې، ګډې همکارۍ، د اړیکو د ټینګښت، او د دې ادارې د فعالیتونو او اقداماتو د انعکاس کېدو په موخه، مشورتي غونډه وکړه.
په دې ناسته کې د چاپېریال ساتنې ملي ادارې عمومي رئیس شاه زمان میوندي، مسلکي معین انجنیر عزت الله صديقي، د مالي او اداري چارو معین محمد یوسف حمیدیان، د جمهوري ریاست د لومړي مرستیال د دفتر استازي مولانا فرید او د رسنیو مسوولینو ګډون کړی وو.
د غونډې په پیل کې د چاپېریال ساتنې ملي ادارې عمومي رئیس شاه زمان میوندي د رسنیو د مسوولینو له ګډون څخه مننه وکړه او د دې ادارې د فعالیتونو، چاپېریالي ګواښونو او له هواککړتیا سره د مبارزې په برخه کې یې د دې ادارې د ونډې او خاصتا د کابل ښار د ککړتیا په تړاو خبرې وکړې.
ښاغلي میوندي زیاته کړه: د هوا ککړتیا یوه جدي نړیواله ننګونه ده او افغانستان هم له دې ګواښ څخه په امان کې نه دی، د نړیوال روغتیايي سازمان څېړنې ښیي چې هرکال د 7 میلیونو څخه زیات خلک د هوا ککړتیا له امله مري. نوموړي د هواککړتیا او چاپېریالي ستونزو سره د مبارزې په برخه کې د رسنیو پر فعاله ونډه ټینګار وکړ او د رسنیو پر مسوولینو یې غږ وکړ چې له هواککړتیا سره مبارزې ته لومړیتوب ورکړي. ده وویل: هغه څه چې د چاپېریال ساتنې ملي ادارې پورې تړاو لري، موږ به یې د رسنیو له لارې په صادقانه توګه له ولس سره شریک کړو، له رسنیو مو هیله همدا ده چې د چاپېریال ساتنې پر وړاندې د خلکو په عامه پوهاوي کې ونډه واخلي او اړوندې ادارې خپلو مسوولیتونو ته متوجه کړي.
ورپسې د دې ادارې مسلکي معین انجنیر عزت الله صدیقي د کابل ښار د هواککړتیا د کیفیت د څارنې او ارقامو په هکله خبرې وکړې او ویې ویل: د چاپېریال ساتنې ملي اداره هره ورځ د خپلو وسایلو او امکاناتو په ذریعه د کابل ښار له بیلابیلو سیمو څخه معلومات راټولوي او دغه ارقام ښیې چې په تېرو دوو میاشتو کې په کابل ښار کې د هوا ککړتیا زیاته شوې ده.
ښاغلي صديقي زیاته کړه: د عامه ټرانسپورت تنظیم، د موټرو د تخنیکي چارو د تفتیش چکونو نشتوالی، د خامه سړکونو شتون، په کابل ښار کې د دوامداره بریښنا نشتون، د تولیدي او صنعتي فابریکو ستونزې او د ګازو د نرخ نه کنټرول هغه ستونزې دي چې د کابل ښار هوا یې ککړه کړې ده.
همدا راز د کابل ولایت د چاپېریال ساتنې رئیس کاظم همایون هم د خپلو کړنو او اقداماتو په هکله ګډونوالو ته معلومات ورکړل او ویې ویل: موږ د اړوندو ادارو په همکارۍ توانېدلي یو چې 4078 فعالیتونو څخه چې په هغه کې 588 لوړپوړیزه ودانۍ هم شاملې دي، څارنه وکړو. د دې څارنو په پایله کې اکثره فعالیتونه اصلاح شوي او پاتې نورو ته یې د لیندۍ تر ۱۵مې نېټې پورې وخت ورکړل شوی؛ که چېرته د قوس تر ۱۵مې نېټې پورې دوی خپل فعالیتونو اصلاح نه کړل او زموږ لارښوونې یې عملي نه کړې، نو فعالیتونو به یې بند او څارنوالۍ ته به معرفي شي.
وروسته د ولسمشر د لومړي مرستیال د دفتر او د سهار د شپږ نیمو بجو ناستو غړي مولانا فرید د هوا له ککړتیا سره د مبارزې په برخه کې د ادارې د کړنو او اقداماتو څخه ملاتړ وکړ او زیاته یې کړه: که د ښارګوټو، اصنافو او لوړپویزو ودانیو مالکین له چاپېریالي قوانینو څخه سرغړونه وکړي؛ نو د شپږ نیمو بجو په ناسته کې به له سرغړونکو سره جدي چلند وشي.
د غونډې په پای کې د هواککړتیا سره د مبارزې او چاپېریال ساتنې په برخه کې د رسنیو مسوولینو خپل نظرونه، وړانديزونه او مشورې وړاندې کړې او ویې ویل چې د دې ادارې اجرائیوي صلاحیتونه بايد ډېر، عامه پوهای او اطلاع رسونه نوره هم زیاته شي او موږ د رسنیو د مسوولینو په توګه ژمنه کوو چې له هوا ککړتیا سره د مبارزې په برخه به د چاپېریال ساتنې ملي ادارې سره هر اړخیزه همکاري کوو.