وروستی
د اقليم زرغون صندوق (GCF) ته په مستقیم ډول د لاسرسي وړ بنسټونو لپاره د اعتبار لیک ترلاسه کولو په موخه دوه ورځنی روزنیز ورکشاپ جوړ شو
د مرغومي ۳۰مه نېټه کابل
د چاپېریال ساتنې ملي ادارې د ملګرو ملتونو د کرنې او خوړو سازمان په همکارۍ (FAO) د دې ادارې د بند امیر د غونډو په تالار کې د اقليم زرغون صندوق (GCF) ته په مستقیم ډول د لاسرسي وړ بنسټونو لپاره د اعتبار لیک ترلاسه کولو په موخه دوه ورځنی روزنیز ورکشاپ جوړ کړ چې پکې اړوندو دولتي ادارو او خصوصي سکتور استازو ګډون کړی وو.
په پیل کې د چاپېریال ساتنې ملي ادارې مسلکي معین انجنیر عزت الله صدیقي په ملي، سیمه ییزه او نړۍواله کچه د اقلیمي بدلون له پلوه موجوده ستونزو او ننګونو ته اشاره وکړه او ویې ویل: اوسمهال اقلیمي بدلون د کم ودې هېوادونو په شمول، ټولې نړۍ ته ګواښوونکی دی او د دې معضلې د حل لپاره د اقلیمي بدلون نړۍوالو مالي میکانیزمونو ته لاسرسی اړین دی.
ښاغلي صدیقي زیاته کړه: د اقلیم زرغون صندوق د سترو نړۍوالو مالي میکانیزمونو څخه دی چې له اقلیمي بدلون سره د سازښت او شین کوریزو ګازونو د راکمولو په برخه کې له مخ پر ودې هېوادونو سره مالي مرسته کوي، همدا راز یاد صندوق هر کال یو میلیون ډالره د چمتووالي په پار د مخ پر ودې هېوادونو د پیاوړتیا لپاره ځانګړي کوي چې د افغانستان اسلامي جمهوریت هم له نېکه مرغه تر اوسه پورې د چمتووالي په برخه کې ۱،۳ میلیونه امریکایي ډالره ترلاسه کړي دي.
ورپسې د اقلیمي بدلون رئیس روح الله امین د دې ورکشاپ د جوړېدو موخه د دولتي او خصوصي سکتور د ظرفیت لوړول وبلل او د اقليم زرغون صندوق (GCF) ته په مستقیم ډول د لاسرسي وړ بنسټونو لپاره د اعتبار لیک ترلاسه کول یې د هېواد د مالکیت او د اقلیمي بدلون په برخه کې د پروژو د تطبیق لپاره اړین ګام وباله.
د ورکشاپ په لړ کې د دې ادارې د متخصصینو لخوا د اقلیم زرغون صندوق څخه د اعتبار لیک ترلاسه کولو د څرنګوالي، د جندر د پالیسۍ او مالي مینکانیزمونو په تړاو هر اړخیز معلوماتي پرزنټېشنونه وړاندې شول.