وروستی
د کارکوونکو د کړنو د نوې ارزونې په هکله درې ورځنی روزنیز ورکشاپ جوړ شو
د سلواغې ۴مه نېټه کابل
د چاپېریال ساتنې ملي ادارې د بشري سرچینو ریاست د اداري اصلاحاتو او ملکي خدمتونو خپلواک کمیسیون په همکارۍ د دې ادارې د کول حشمت خان د غونډو په تالار کې د کارکوونکو د کړنو د نوې ارزونې په هکله درې ورځنی روزنیز ورکشاپ جوړ کړی و چې پکې د دې ادارې ۹۵تنو رئیسانو، آمرینو او د اجرائیوي چارو مدیرانو ګډون کړی وو.
د ورکشاپ په پيل کې د دې ادارې د بشري سرچینو رئیس احمد مسعود سېلاب د کارکوونکو د کړنو د ارزونې د اهمیت او څرنګوالي په تړاو خبرې وکړې او ګډونوالو ته یې سپارښتنه وکړه چې د ارزونې د نوو فورمو په ډکولو کې د ورکړل شوو معلوماتو په پام کې نیولو سره جدي پاملرنه وکړي.
د ورکشاپ په لړ کې ګډونوالو ته د کړنو د ارزونې د اصولو، ګټو، شرایطو، اړینو اسنادو او ډولونو په هکله معلوماتي پرزنټېشنونه وړاندې شول چې په دې سره د ورکشاپ ګډونکي په دې وتوانیږي چې د خپلو کړنو د ارزونې نوي طرزالعمل مطابق خپل کاري پلانونه چمتو او د هغه پر اساس په ښه توګه خپلې ورځنۍ چارې ترسره کړي.