وروستی
د اوزون پوړ د ویجاړوونکو ګازونو د قاچاق او مخنیوي په برخه کې د ګمرکونو ونډه با اهمیته ده
د سلواغې 16مه نېټه کابل
د چاپېریال ساتنې ملي ادارې په همکارۍ د ګمرکونو لوی ریاست لخوا پرون د سلواغې په ۱۵مه نېټه کابل سټار هوټل کې د ګمرکونو نړۍواله ورځ ولمانځل شوه چې پکې د صنعت او تجارت وزیر نثار احمد غوریاني، د چاپېریال ساتنې ملي ادارې د مالي او اداري چارو معین محمد یوسف حمیدیان، د ګمرکونو رئیسې آغلې آمنې احمدي، د سوداګرۍ خونو رئیس یونس مومند، د اړوندو وزارتونو معینانو، رئیسانو، ملي سوداګرو، مدني ټولنې غړو او د رسنیو استازو ګډون کړی وو..
د چاپېریال ساتنې ملي ادارې د مالي او اداري چارو معین محمد یوسف حمیدیان د چاپېریال ساتنې په برخه کې خصوصاً د اوزون پوړ د ویجاړوونکو ګازونو د قاچاق او مخنیوي په برخه کې د ګمرکونو ونډه با اهمیته وبلله. ده وویل: ګمرکونه د هیواد په سرحدونو کې د نړۍوالو اکمالاتي چارو د پیاوړتیا او د باثباته راتلونکي ضمانت کوي چې په دې برخه کې چاپېریال ته د زیان رسوونکو توکو کنټرول او د طبیعي میراثونو د ناقانونه تجارت مخنیوی اړین ګڼل کیږي.
د صنعت او تجارت وزیر نثار احمد غوریاني او د ګمرکونو رئیسې آغلې آمنې احمدي هم د ګمرکونو د اهمیت، اصلاحاتو، پرمختګ او نوو پلانونو په هکله هر اړخیزه وینا وکړه.
د غونډې په پای کې د دې ادارې د اوزون ملي دفتر د برنامو مسوول احمد شعیب نورزاد لخوا ګډونوالو ته د څو اړخیزو چاپېریالي تړونونو په پلي کېدو کې د ګمرکونو د ونډې په هکله معلوماتي پرزنټېشن وړاندې شو.
د یادونې وړ ده چې د ګمرکونو نړۍواله ورځ هر کال د جنورۍ په ۲۶مه نېټه د نړۍ په ډېرو هېوادونو کې د ګمرکونو د کړنو د ستاینې په پار لمانځل کیږي چې سږ کال په افغانستان کې د چاپېریال ساتنې ملي ادارې لخوا د مونتریال تړون د تعهداتو د پلي کېدو په اساس د یو لړ مراسمو په ترڅ کې ولمانځل شوه.