وروستی
په ملي کچه د ټاکل شوې ونډې د مسودې په اړه مشورتي ناسته وشوه
د سلواغې ۲۹مه - کابل
د چاپېریال ساتنې ملي ادارې د ۱۳۹۹ کال د سلواغې په ۲۹مه نېټه پارک سټار هوټل کې په ملي کچه د ټاکل شوې ونډې په اړه مشورتي غونډه وکړه چې پکې د اړوندو ادارو کابو ۶۰ تنو استازو ګډون کړی وو.
د ناستې په پیل کې د چاپېریال ساتنی ملي ادارې د اقلیمي بدلون رئیس انجنیر روح الله امین د نړۍوالو مالي میکانیزمونو او اقلیمي بدلون په برخه کې شته مرستو او فرصتونو ته اشاره وکړه. ده له ګډونوالو وغوښتل چی ددغه ملی سند د لا غني کیدو او بډاینې لپاره باید خپل نظرونه، نیوکې او وړاندیزونه له چاپېریال ساتنې ملي ادارې سره شریک کړي؛ تر څو په دې سند کې و اوډل شي. نوموړي یادونه وکړه چه دا یو مهم فرصت دی چې موږ د آغاخان، UNDP او ARUP په همکارۍ د اړوندو ادارو له مسئولینو سره مشورتي غونډه جوړه کړه او موخه مو همدا ده چې یاد سند باید په معیاري او د هېواد د اوسنیو اړتیاوو په پام کې نیولو سره جوړ شي.
ښاغلي امین دغه سند د هیواد لپاره خورا مهم وباله، ځکه چې ددې پر بنسټ به د اقلیمی بدلون سره د سازښت او مبارزې په برخه کې افغانستان نړۍ والې مرستې تر لاسه کړي، که دا سند هر څومره ستندرد او معیاري وي؛ نو د مرستو په راجلبولو کې به هومره اغیزمن او ګټور ثابت شي.
ورپسې د ملګرو ملتونو د پراختیایي پروګرام استازي محمد سلیم هم د ټاکل شوې ونډی د سند په اهمیت خبرې وکړې او ټولو ګډونوالو ته یې ډاډ ورکړ چې یو با کیفیته سند په جوړوو او په دواړو ملي ژبو پښتو او دري به یې له ټولو هېوادوالو سره شریکوو.
د غونډې په لړ کې د کارپوهانو لخوا معلوماتي پرزنټیشنونه وړاندې شول، د ګډونوالو پوښتنې ځواب او یاده غونډه د ګروپي کارونو په ترسره کولو سره پای ته ورسېده.
د یادونې وړ ده چې په ملي کچه د ټاکل شوې ونډې د مسودې سند به په راتلونکو شپږو میاشتو کې د چاپېریال ساتنې ملي ادارې لخوا د AKAH، ARUP، UNDP په همکارۍ بشپړ شي.
خبریال: عبدالولي عابد
عکاس: سید امید سادات