وروستی
د چاپېریال ساتنې ملي ادارې عمومي رئیس په افغانستان کې د ملګرو ملتونو د پراختیايي پروګرام (UNDP) له رئیس سره وکتل
د کب ۳مه نېټه-کابل
د چاپېریال ساتنې ملي ادارې عمومي رئیس شاه زمان میوندي د کب په درېیمه نېټه په افغانستان کې د ملګرو ملتونو د پراختیايي پروګرام (UNDP) له رئیس سره په خپل کاري دفتر کې لیدنه وکړه.
ښاغلي میوندي د ملګرو ملتونو د پراختیایي پروګرام رئیس او ورسره پلاوي هرکلی وکړ، په دې دوه اړخیزه لیدنه کې چې د دې ادارې د پلان، پالیسۍ او نظارت معین حسیب پایاب او د UNDP مرستیال ادریس ملیار هم حضور درلود، د شته ګواښونو او مهمو چاپېریالي مسایلو په اړه بحث وکړ.
د چاپېریال ساتنې ملي ادارې عمومي رئیس د دې ادارې د تېرو څو کلونو د لاسته راوړنو په هکله خبرې وکړې او ویې ویل: اوسمهال دې ادارې د تېر په پرتله نړۍوالو مالي میکانیزمونو ته لاسرسی موندلی؛ خو په دې برخه کې لا ډېرې همکارۍ ته اړتیا شته. نوموړي همدا راز د دې ادارې د راتلونکو پلانونو په هکله د UNDP رئیس ته معلومات ورکړل او د پلانونو د تطبیق خصوصاً د ظرفیت لوړولو په برخه کې یې ترې د همکارۍ غوښتنه وکړه.
|وروسته په افغانستان کې د ملګرو ملتونو د پراختیايي پروګرام رئیس الدرداري د چاپېریال ساتنې ملي ادارې له مشرتابه مننه وکړه، د خپلو همکاریو په هکله یې معلومات ورکړل او ویې ویل: راتلونکي کال کې به له دې ادارې سره د چاپېریالي پالیسۍ د پراختیا، نړۍوالو مالي میکانیزمونو او د ټاکل شوې ونډې سند (NDC) په برخو کې له چاپېریال ساتنې ملي ادارې سره همکاري وکړي.
د UNDP رئیس ژمنه وکړه چې د ظرفیت لوړنې او په نورو برخو کې به هم له دې ادارې سره همکاري وکړي.