وروستی
د لوړو زده کړو وزارت مشرتابه ژمنه وکړه چې د نیالګیو کېنولو ملي پروسه کې به اکاډمیک بنسټونه فعال ګډون کوي
۱۳۹۹کال د کب ۱۱مه - کابل
د چاپېریال ساتنې ملي ادارې عمومي رئیس شاه زمان میوندي او ورسره پلاوي یې د دوشنبې په ورځ د لوړو زدکړو له وزیر ډاکتر عباس بصیر سره د هغه په کاري دفتر کې وکتل.
دغه لیدنه د مخکینیو لیدنو په دوام ده چې د لوړپوړو دولتي چارواکو خاصتا د کابینې له غړو سره د نیالګیو کینولو ملي پروسې د ښه تطبیق او د دولتي ادارو تر منځ د همغږۍ د لا پیاوړتیا په موخه ترسره کیږي.
د دغه پلان پر اساس ټول تحصیلي بنسټونه، علمي کدرونه د پوهنتونونو محصلین او د ټولو دولتي او نادولتي تحصیلي موسسې د نیالګیو کینولو ملي کمپاین اساسي برخې ګڼل کیږي.
د چاپېریال ساتنې ملي ادارې عمومي رئیس شاه زمان میوندي د نیالګیو کېنولو ملي پروسې په تطبیق کې د دولتي او خصوصي پوهنتونونو د استادانو او محصلینو رول مهم وباله او د لوړو زدکړو وزارت له مشرتابه څخه یې غوښتنه وکړه چې د نیالګیو کېنولو ملي پروسه کې چې یوه ملي، ټولیزه او ټولو هېوادوالو پورې اړه لري، فعاله ونډه واخلي.
د چاپیریال ساتنې ملي ادارې عمومې رئیس زیاته کړه : استادان او محصلین کولی شي د یو نیالګي په کېنولو سره له نورو مخکښ او الګو و اوسې او ددغه با ارزښته کلتور په پلي کولو کې خپل ملي او اساسي رول ترسره کړي.
د لوړو زدکړو وزیر ډاکتر عباس بصیر په هیواد کې د نیالګیو کېنولو ملي پروسې څخه د ملاتړ ترڅنګ ژمنه وکړه چې د لوړو زده ګړو وزارت به د دغه ملي کمپاین د ښه تطبیقولو په برخه کې له ټولو مسوولو بنسټونو سره همکاري کوي او د ټولو دولتي او خصوصي پوهنتونونو استادان او محصلین به د نیالګیو کېنولو ته هڅوي.
د یادولو وړ ده چې د ۹۹- ۱۴۰۰ د نیالګیو کېنولو طرحې په اساس به په ټول هېواد کې ۲۵میلیونه نیالګي کېنول شي، بې له شکه چې د دې طرحې په عملي کولو کې د ټولو هېوادوالو په ځانګړې توګه د اکاډمیکو بنسټونو ونډه خورا مهمه او ارزښتناکه ده.
هرا_فغان_یوه_ورځ_یو_نیالګی
د_سولې_او_ښېرازۍ_نیالګی