وروستی
د سالم او ښېرازه چاپېريال لپاره بايد شين انقلاب رامنځته کړو
۱۳۹۹کال د کب ۲۱مه کابل
د نیالګیو کېنولو ملي کمپاین پر دوام نن پنجشنبه د روان کال پر ۲۱مه د عدلیې وزارت په انګړ کې چې د چاپېریال ساتنې ملي ادارې عمومي رییس شاه زمان میوندي، د عدلیې وزیر فضل احمد معنوي، د یاد وزارت معینانو، د ښاروالۍ معینې مهتاب عالمي او اړوندو ادارو استازو ګډون کړی و، د نیالګیو کېنولو ملي ورځ ولمانځل شوه.
په پیل کې د عدلیې وزیر فضل احمد معنوي ګډونوالو ته د ښه راغلاست تر څنګ زیاته کړه: سمسور چاپېریال نه یوازې داچې د یوه ښار په ښکلا کې لوی رول لوبوي؛ بلکي تر څنګ یې د هوا په پاکوالي کې هم مثب رول لوبولی شي. ده همدا راز د نیالګیو کېنول له اسلامي اړخه جاریه صدقه وبلله.
ورپسې د چاپېریال ساتنې ملي ادارې عمومي رییس شاه زمان میوندي د نیالګیو کېنولو ملي کمپاین په اړه، چې یوه ورځ مخکې پیل شوی خبرې وکړې او زیاته کړه، د نیالګیو کېنولو په پروسه کې د خلکو ګډون تر ډېره مهم دی، چې له نېکه مرغه سږ کال تر دې مهاله په ټول هېواد کې ۲۲۰برنامې ترسره شوې، ۱۱زره خلکو پکې ګډون کړی او تر ۲لکو پورې نیالګي کېنول شوي، چې دغه برنامې به په راتلونکو ورځو کې هم ترسره او پلې شي.
ښاغلي میوندي په ټولو هېوادوالو غږ وکړ، چې د نیالګیو کېنولو په دغې ملي پروسه کې ګډون وکړې او د هېواد په زرغونتیا، ښېرازۍ او ښکلا کې برخه واخلي او یو خوندي او سمسور چاپېریال رامنځته کړي.
د یادې لمانځغونډې په پای کې د ښاروالۍ معینې مهتاب عالمي هم خبرې وکړې او ویې ویل، چې سږ کال کابل ښاروالۍ له زورواکو او غصب کوونکو لسګونه جریبه ځمکه راګرځولې چې په راتلونکې کې به دغه راګرځول شوې ځمکې د ماشومانو، ښځو او هېوداوالو لپاره په تفریحي پارکونو او زرغونو سیمو بدلې شي.
د یادونې وړ ده چې سږ کال به په ټول هېواد کې ۲۵ملیونه نیالګي کېنول شي.
هرا فغان یوه ورځ یو نیالګی
د سولې او ښېرازۍ نیالګی