وروستی
د کب ۲۰مه،"د سولې او ښېرازۍ نیالګي" تر شعار لاندې ولمانځل شوه
۱۳۹۹کال د کب ۲۰مه کابل
د نیالګیو کېنولو ملي کمپاین، نن د کب په ۲۰مه د کابل په قلعه مسلم کې د شاندارو مراسمو په لړ کې رسماً پیل شو چې پکې د چاپېریال ساتنې ملي ادارې عمومي رئیس شاه زمان میوندي، وزیرانو، د اړوندو ادارو معینانو ، رئیسانو، مدني فعالانو، رضاکارانو، د دې ادارې د ټولو کارکوونکو او د سیمې مشرانو ګډون کړی وو.
د کمپاین په پيل کې ښاغلي میوندي د ګډون والو هرکلی وکړ او زیاته یې کړه: د تېرو څو لسیزو جګړو زموږ د هېواد چاپېریالي وضعیت ډیر خراب کړی؛ نو موږ ته اړینه ده چې په ګډه یو ملي خوځښت رامنځته کړو، شین انقلاب جوړ کړو او د یوه سمسور او ښېرازه افغانستان لپاره هڅې وکړو، د دې کار لپاره اړتیا ده چې د دولتي ادارو، خصوصي سکتور، مدني ټولنو، اکاډمیکو او ښوونیزو بنسټونو، علمای کرامو او ځوانانو تر منځ قوي او غښتلې همغږي رامنځته شي.
نوموړي وویل: د نیالګیو کېنولو لپاره نوې کړنلاره په پام کې نېول شوې، د دایمي ساتنې او پالنې لپاره یې هم تدابیر نیول شوي دي او دغه ملي پروسه به د ټولو خلکو په ګډون تطبیق شي.
ښاغلي میوندي د ټولنې پر مختلفو اقشارو، علمای کرامو، دولتي ادارو، خصوصي سکتور، اکاډمیکو او ښوونیزو بنسټونو، مدني ټولنو، مېرمنو، د ملکي خدمتونو کارکوونکو، نظامیانو او ټولو هېوادوالو غږ وکړ چې په دې ملي پروسه کې برخه واخلي او د نیالګیو په کېنولو، ساتنه او پالنه کې خپل مسوولیت ادا کړي.
ورپسې د کرنې، اوبو لګولو او مالدارۍ وزارت معین شیر شاه امیري ژمنه وکړه چې په مرکز او ولایتونو کې به ټولو هغو بنسټونو ته چې د نیالګیو کېنو ته لېواله وي د اړتیا وړ نیالګي ورکړي.
د کابل ښاروالۍ معینې ډاکټرې مهتاب عالمي له ټولو کابل ښاریانو څخه غوښتنه وکړه چې د کېنول شوو نیالګو په ساتنه او پالنه کې همکاري وکړي.
د ارشاد، حج او اوقافو وزارت معین ډاکټر امین الدین مظفري وویل: دین زموږ اصلي او اساسي ادرس دی او موږ ته یې د نیالګیو کېنولو، د ونو او بوټو د اهمیت، ساتنې او پالنې په هکله جدي سپارښتنې کړې دي، په ډېرو احادیثو کې ټینګار شوی چې د نیالګیو کېنول صدقه دي، موږ ټول باید په ګډه خپل دیني مسوولیت ادا کړو.
نوموړي ژمنه وکړه چې راتلونکې جمعه به په ټولو جوماتونو کې د نیالګیو کېنولو د اهمیت او ارزښت په اړه د ملا امامانو لخوا خلکو ته تبلیغ وشي.
همدا راز د کابل والي محمد یعقوب حیدري، د کلیو پراختیا او بیارغاونې وزارت معین او د قلعه مسلم سیمې یوه تن سپین ږیري له ټوله هېوادوالو غوښتنه وکړه چې د یوه نیالګي په کېنولو سره خپل دیني مسوولیت ادا کړي.
د یادولو وړ ده چې نن د کب ۲۰مه په ټول هېواد کې د نیالګیو کېنولو ملي کمپاینونه پیل شول او د مختلفو برنامو په لړ کې به ۲۵ میلیون نیالګي کېنول شي.
هر افغان یوه ورځ یو نیالګی
د سولې او ښېرازۍ نیالګی