وروستی
د ولسي جرګې رئیس د نیالګیو کېنولو ملي پروسې بشپړ ملاتړ وکړ
۱۳۹۹کال د کب ۲۳مه کابل
د چاپېریال ساتنې ملي ادارې عمومي رئیس؛ شاه زمان میوندي د نیالګیو کېنولو ملي کمپاین د تطبیق په تړاو د خپلو لیدنو په لړ کې، نن شنبه د کب په ۲۳مه د ولسي جرګې له رئیس میر رحمان رحماني سره وکتل.
په پیل کې ښاغلي میوندي د ولسي جرګې رئیس ته د نیالګیو کېنولو ملي کمپاین په هکله معلومات ورکړل او ویې ویل: هغه پلان چې د دې ادارې له لوري له اړوندو ادارو سره په ګډه همکارۍ جوړ شوی دی، د اړوندو ادارو ونډه پکې په ګوته شوې او اړینه ده چې د دې پلان په تطبیق کې د ولسي جرګې ویاړلي استازي هم پراخه همکاري وکړي.
په دې ناسته کې دواړو خواوو په هېواد کې د نیالګیو کېنولو ملي پلان د ښه تطبیق په تړاو بحث وکړ.
د ولسي جرګې رئیس د دې پلان د تطبیق په برخه کې د همکارۍ ژمنه وکړه او دا یې د خلکو مسوولیت وباله چې په دغه ملي بهیر کې پراخه ونډه واخلي.
سږ کال به د منظور شوي پلان پر بنسټ په ټول هېواد کې د بېلابېلو دولتي ادارو په همږغۍ او د ټولو هېوادوالو په ګډه همکارۍ ۲۵ میلیونه نیالګي کېنول شي.