وروستی
په صنعتي پارکونو کې د سولي او ښېرازۍ نیالګي کېنول شول
۱۳۹۹کال د کب ۲۷مه کابل
د چاپېریال ساتنې ملي ادارې او صنعت او تجارت وزارت په ګډه همکارۍ د نیالګیو کېنولو ملي کمپاین په لړ کې نن چهارشنبه د کب په ۲۷مه د کابل په صنعتي فابریکو کې د نیالګیو کېنول پیل کړل.
په دې کمپاین کې د چاپېریال ساتنې ملي ادارې عمومي رئیس شاه زمان میوندي، د صنعت او تجارت وزیر نثار احمد غوریانی، د دې ادارې د نظارت او پالیسۍ معین حسیب پایاب، رئیسانو او صنعت کارانو ګډون کړی وو.
په پیل کې ښاغلي غوریاني د نیالګیو کېنولو ملي کمپاینونو د جوړولو له کبله د چاپېریال ساتنې ملي ادارې کړنې وستایلې او ویې ویل: د صنعت او تجارت وزارت د افغانستان په ټولو صنعتي شرکتونو کې د نیالګیو کېنول پیل کړي دي.
نوموړي د نیالګيو په ساتنې او پالنې ټینګار وکړ او صنعت کاران یې د نیالګیو کېنولو ته وهڅول او ویې ویل: څومره چې تاسو صنعت او تجارت با اهمیته دی، همدومره سمسور چاپېریال او ښکلی طبیعت هم باارزښته دی.
د چاپېریال ساتنې ملي ادارې عمومي رئیس شاه زمان میوندي د نیالګیو کېنولو په ملي کمپاین کې د صنعت کارانو رول بااهمیته وباله او ویې ویل: په تېرو څو کلونو کې په هېواد کې نیالګي کېنول کېدل؛ خو د ادارو تر منځ همغږي ضعیفه وه، امار او ارقام نه ول، د نیالګیو ساتنه او پالنه نه کېده او د خلکو نه لېوالتیا د دې لامل شوه چې ولسمشر د دې ستونزو د حل لپاره ځانکړی حکم صادر کړ.
ښاغلي میوندي زیاته کړه: تېر کال د دولتي ادارو د قوي همغږۍ او د خلکو په ګډون په ټول هېواد کې کابو ۱۷میلیونه نیالګي کېنول شول او سږ کال د نیالګیو کېنولو ملي کمېټه په پام کې لري چې د خلکو په ګډون او د نیالګیو کېنولو نوې ګړنلارې پر بنسټ، په ټول هېواد کې ۲۵میلیونه نیالګي کېنوي چې جدي ساتنه او پالنه به یې کیږي.
ښاغلي میوندي تېرې څو لسیزې جګړې د هېواد د چاپېریالي وضعیت د ویجاړتیا لامل وبللې او ویې ویل چې د دې حالت د بدلون لپاره باید ټول په ګډه یو ملي خوځښت رامنځته کړو، زرغون انقلاب جوړ کړو او د یوه سمسور او ښېرازه افغانستان لپاره هڅې وکړوږ ده همدا راز له ټولو هېوادوالو وغوښتل چې د نیالګیو په کېنولو، ساتنه او پالنه کې خپل دیني مسوولیت ادا کړي.
د نیالګيو کېنولو له مراسمو وروسته د چاپېریال ساتنې ملي ادارې عمومي رئیس او د صنعت او تجارت وزیر د ځېنو فابریکو د فعالیت له څرنګوالي څخه لیدنه وکړه او د قانون مطابق یې د فابریکو د کړنو برابرولو لپاره اړینې لارښوونې وکړې.
هر افغان یوه ورځ یو نیالګی
د سولې او ښېرازۍ نیالګی