وروستی
د ژوند بڼو نړيواله ورځ د(موږ د طبيعت د حل لارې يوه برخه يو) تر شعار لاندې د يوې پرتمينې غونډې په ترڅ کې ولمانځل شوه
د غبرګولي لومړۍ نېټه، کابل
د چاپېريال ساتنې ملي ادارې، کرنې اوبو لګولو او مالدارۍ وزارت، په افغانستان کې د وحشي ژوو د ساتنې موسسې(WCS) په ګډه همکارۍ، د کرنې وزارت د پامير د غونډو په تالار کې د ژوندبڼو نړيواله ورځ د يوې پرتمينې غونډې په ترڅ کې ولمانځل شوه. په دغه غونډه کې لوړپوړو دولتي چارواکو، د پوهنتون استادانو، محصلينو، د رسنيو استازو او لسګونو کسانو ګډون کړی وو.
په پيل کې د کرنې اوبو لګولو او مالدارۍ وزارت د طبيعي سرچينو عمومي رئيس محمد رفيع قاضي زاده، د ياد وزارت د طبيعي منابعو او اوبو لګولو معين حشمت الله غفوري ګډونوالو ته ښه راغلاست ووايه او د ژوند بڼو د ارزښت په اړه يې هراړخيزه وينا وکړه، دوی ژوند بڼې د ايکو سيستمونو د رامنځته کېدو اساس ياد کړ او پر ټولو يې غږ وکړ چې د ژوند بڼو په ساتنه کې خپل مسوليت ادا کړي.
ورپسې د چاپېريال سلاتنې ملي ادارې مسلکي معين انجنير عزتالله صديقي هېوادوالو ته د ژوند بڼو نړيوالې ورځې د مبارکۍ تر څنګ، ژوند بڼې د انساني ورځني ژوند، اقتصاد، اقليمي بدلون او نورو برخو سره تړلې وبللې زياته يې کړه: ژوند بڼې د انساني ژوند سره مستقيمې اړيکې لري، چې پرته له ژوند بڼو انساني ژوند نيمګړی دی. همدا رنګه يې ژوند بڼې د هېواد په اقتصادي سير کې اهم توک وباله.
ښاغلي صديقي د افغانستان کوچنۍ جغرافيه د څو ډوله اقليم، ايکوسيستمونو، ځنګلونو، ژوند بڼو، وحشي ژوو او نورو چاپېريالي مورادو وړ جغرافيه ياده کړه، ده وويل چې په دې برخه کې بايد په ګډه د پېښېدونکو ګواښونو مخه ونيسو او په ګډه دغه مسوليت ادا کړو، همدارنګه يې ژوند بڼې د خدای تعالی ج مخلوق ياد کړ، طبيعي پديده يې وبلله او پر ټولو يې غږ وکړ چې د تخريب د مخنيوي په برخه کې يې هلې ځلې وکړي. ده همدا راز د عامه پوهاوي لوړولو په برخه کې د رسنيو له استازو مننه وکړه چې تل يې د عامه پوهاوي په برخه کې خپل مسوليت ادا کړی دی.
د يادې غونډې په اوږدو کې د پوهنتون د استادانو له لوري معلوماتي پرېزېنټېشنونه وړاندې شول، د پنل غړو تر منځ بحث تر سره شو او د ګډونوالو پوښتنو او وړانديزونو ته د پنل د غړو له لوري ځوابونه ورکړل شول.