وروستی
د چاپېريال ساتنې ملي ادارې عمومي رئيس د چاپېريالي رضاکارانو شبکې له غړو سره وليدل
د غبرګولي۲۶مه کابل
د چاپېريال ساتنې ملي ادارې عمومي رئيس پښتون عاطف نن (چهارشنبه دغبرګولي ۲۶مه) د چاپېريالي رضاکارانو شبکې له غړو سره د دې ادارې د بند امیر د غونډو په تالار کې وکتل.
په پيل کې د چاپېريالي رضاکارانو شبکې مسوول عبدالهادي اڅکزي د يادې شبکې موخې، برنامې، راتلونکي پلانونه او د یادې شبکې لاسته راوړنې د چاپېريال ساتنې ملي ادارې له مقام سره شريکې کړې. ده وویل: د چاپېريالي رضاکارانو شبکه هڅه کوي چې د چاپېريالي موخو پلي کولو او د چاپېريالي مسایلو اړوند د خلکو د عامه پوهاوي د لوړولو په برخه کې همکاري وکړي.
همدارنگه د شبکې غړو د چاپیریالي او مدني بنسټونو سره د اړیکو پياوړي کولو، د اوبو ککړتيا مخنيوي لپاره د ښاري کاناليزاسيون د حل لارو، د پلاستيکي توکو او کڅوړو نه کارولو، د محصلينو او زده کوونکو لپاره د ښوونيزو برنامو جوړولو په اړه خپل نظریات او وړاندیزونه وړاندې کړل.
د چاپېريال ساتنې ملي ادارې عمومي رئيس د چاپېريالي رضاکارانو رضاکارانو شبکې د نظرونو او وړانديزونو له اورېدو وروسته، د چاپېريال ساتنې لپاره د هغوی د رضاکارانه کار څخه مننه وکړه او هڅې يې وستايلې.
ښاغلي عاطف وويل: دا يو لوی ګام دی چې تاسو له مالي او تخنيکي منابعو پرته د چاپېريال ساتنې لپاره کار کوئ، ده زياته کړه د چاپېريال ساتنې لپاره نه يوازې تاسو او دغه اداره مسووليت لري، بلکي ټولې ډلې، شبکې، رسنۍ، علمای کرام او خلک مسول دي ترڅو د خپل ځان د روغتيا او سلامتۍ لپاره د چاپېريال ساتنې او ککړتياوو مخنيوي په برخه کې ملي او ايماني مسوليت ادا کړي.
د چاپېريال ساتنې ملي ادارې عمومي رئيس د چاپېريالي رضاکارانو شبکې له غړو سره ژمنه وکړه چې د شبکې د موخو د تحقق او برنامو په برخه کې به همکاري کوي او هېڅ ډول همکاري به ترې نه درېغوي.