وروستی
د ملي عمل درېیم پروګرام کې د شمولیت په موخه د ټولنې بېلابېلو پرګنو وړاندیز شوو موضوعګانو راټولولو په موخه د افغانستان پرانیستې دولتدارۍ مشارکت اعلامیه
د افغانستان اسلامي جمهوري دولت د پرانیستې دولتدارۍ مشارکت د ملي عمل درېیم پروګرام د تدوین بهیر په نېږدې ورځو کې پیلیږي.
د پرانیستې دولتدارۍ مشارکت (OGP) د لارښود پر بنسټ د دغه سازمان د غړو هېوادونو د ملي عمل پروګرامونه د مدني ټولنې بنسټونو په مشارکت تدوین او چمتو کیږي. د افغانستان اسلامي جمهوري دولت د پرانیستې دولتدارۍمشارکت غړیتوب له تر لاسه کولو تر دې دمه خپل د ملي عمل پروګرامونه د یاد لارښود په رڼا کې تدوینوي.
د افغانستان ملي عمل لومړی پروګرام په بریا سره تطبیق شوی او د ملي عمل دویم پروګرام د مدني ټولنې بنسټونو او هېوادونو په پراخ مشارکت سره تدوین شوی او د تطبیق په وروستیو پړاوونو کې دی. د افغانستان اسلامي جمهوري دولت د ملي عمل دویم پروګرام کې ۱۸ بدلون راوړونکې ژمنې شاملې دي چې په تطبیق سره به یې د عامه خدمتونو په برخه کې روڼتیا او حساب ورکول زیات او د ملي پالیسیو په تدوین کې به د عامه مشارکت زمینه برابره شي. د بېلګې په توګه د "ذینفع مالکیت د ثبت او پلټنې مقررې" ژمنې څخه چې د حساب ورکولو؛ ځواب ویلو او روڼتیا لوړولو په برخه کې تدوین او تصویب شوې، یادونه وکړو. په باوري توګه د هغې په سم تطبیق سره به له ډول ډول جرمنو (له مالیاتو تېښته، د پیسو تطهیر، د ترهګرۍ تمویل او د نشهیي توکو قاچاق) څخه مخنیوي وشي.
دا چې د ملي عمل دویم پروګرام د تطبیق وخت په تمامیدو دی او ډیری ژمنې یې بشپړې شوي، د افغانستان اسلامي جمهوري دولت په پام کې لري چې د پرانیستېدولتدارۍ مشارکت د ملي عمل درېیم پروګرام د تدوین چارې هم پیل کړي؛ نو له دې کبله له ټولو وزارتونو، خپلواکو ادارو، د مدني ټولنې بنسټونو، رسنیو، ښوونیز او علمي سکتور او هېوادوالو څخه په درنښت هیله کیږي چې خپلې وړاندیز شوې موضوعګانې چې په (روڼتیا، حساب ورکولو، د عامه پالیسیو په تدوین او تطبیق بهیر کې د هیوادوالو مشارکت د ښه والي او لوړاوي او له نوې ټکنالوژۍڅخه استفادې پورې اړوندې وي) د ملي عمل درېیم پروګرام کې د شمولیت په موخه د ۱۴۰۰ کال د زمري تر ۵مې نېټې پورې د لاندې برېښنالیکونو له لارې، موږ سره شریکې کړئ.
Info@ogpa.gov.af او faisal.stanekzai2@gmail.com
د یادونې ده چې د پرانیستې دولتدارۍ سکرتریت د هېواد د ملي عمل پروګرامونو د اسانچاري رول لري او ستاسو وړاندیز شوې موضوعګانې به له توحید وروسته اړوندو مراجعو په تېره د افغانستان پرانیستې دولتدارۍ مشارکت ټولګې عمومي فورم ته وړاندې شي.
د لا زیاتو معلوماتو لپاره د پرانیستې دولتدارۍ مشارکت ویب سایټ (http://ogpa.gov.af) ته ورشئ