وروستی
د اقلیمي چارو بېړنۍ ملي کمېټې غونډه کې د ټاکل شوې ملي ونډې(NDC) په سند بحث وشو
د زمري ۱۲مه/ کابل
د چاپېریال ساتنې ملي ادارې مسلکي معین انجنیر عزت الله صدیقي په مشرۍد اقلیمي چارو بېړنۍ ملي کمېټې غونډه کې د ټاکل شوې ملي ونډې( NDC) په سند بحث وشو چې پکې د اړوندو وزارتونو او ادارو استازو، د پوهنتون استادانو، د آغاخان بنسټ استازي او (ARUP) موسسې تخنیکي ټیم ګډون کړی وو.
د دې غونډې د جوړیدو موخه د افغانستان د ټاکل شوې ملي ونډې پر سند بیا کتنه وه چې نوموړی سند به د پاریس تړون د لارښوونو مطابق د (COP26) کنفرانس غړو هېوادونو غونډه چې د روان زیږدیز کال د نوامبر میاشت کې په لندن ښار کې جوړیږي؛ یاد سند به د ملګرو ملتونو د اقلیمي بدلون کنوانسیون سکرتریت ( UNFCCC) ته وړاندې شي.
ښاغلي صدیقي د (NDC) سند په هکله د کمېټې غړو ته معلومات ورکړل او ویې ویل: د ټاکل شوې ملي ونډې سند یو ملي سند دی چې د اقلیمي بدلون غړو هېوادونو لخوا چمتو شوی او د اقلیمي بدلون کنوانسیون سکرتریت ته به وړاندې شي، په دې سند کې تر 2030 کال پورې د افغانستان لپاره د ګلخانهیي ګازونو د انتشار یا خپرېدو کچه ۱۷.۴ سلنه راکمول هدف ټاکل شوی چې دغه هدف د نړیوالو مالي مرستو پورې مشروط دی او همدا راز د اقلیمي بدلون له اغېزو سره سازښت، د اقلیمي بدلون مالي سرچینې او نور اړوند موضوعات، ټول پکې شامل دي.
د دې ادارې مسلکي معین د کمېټې له ټولو غړو وغوښتل چې د وروستي ځل لپاره خپل نظرونه، وړاندیزونه او مشورې د دې سند د بشپړولو لپاره له چاپېریال ساتنې ملي ادارې سره شريکې کړي.
همدار راز په دې غونډه کې د کمېټې غړو د نوې کېدونکې انرژۍ، د مېرمنو د ونډې، د کافي بودیجې په نظر کې نیولو، طبیعي پېښو، له خوارځواکۍ سره د مبارزې او د اقلیمي بدلون مسایلو په تړاو خپلې پوښتنې او نظرونه وړاندې کړل.
د (ARUP) موسسې استازي وویل: ستاسو د نظرونو مطابق به له اقلیمي بدلون سره د سازښت او د ګلخانهیي ګازونو د راکمولو په برخه کې هڅه وشي؛ ترڅو هغه بودیجه چې تاسو یې یادونه کړې، په دغه سند کې و اوډل شي.