وروستی
د نیالګیو کېنولو ملي کمپاین
په تړاو د چاپېریال ساتنې ملي ادارې اعلامیه
بسم الله الرحمن الرحیم
قدرمنو هېواد والو!
ټولو ته معلومه ده چې د کب ۲۰مه نېټه د نیالګيو کېنولو ملي ورځې په توګه نومول شوې، اوس چې موږ او تاسو د پسرلي د راتلو په درشل کې یو زموږ ټولو ملي او ایماني مسوولیت دی چې د هېواد د ښېرازۍ او سمسورتیا لپاره مټې راونغاړو او د یوه ښېرازه او سمسور افغانستان لپاره هلې ځلې وکړو.
د چاپېریال ساتنې ملي اداره پر ټولو درنو هېوادوالو غږ کوي چې راتلونکي پسرلي ته ټول چمتووالی ولري؛ نیالګي کېنوي، ساتنه او پالنه یې هم وکړي. د علمای کرامو، خطيبانو او د مسجدونو له محترمو امامانو څخه هيله کوو چې د نبوي احادیثو او د شريعت په رڼا کې د نیالګیو د اهمیت، ارزښت او پالنې په هکله خلکو ته په ځانګړو ناستو او عامه مجالسو کې او د مسجدونو د منبرونو له لارې پوهاوی ورکړي. د پوهنتونونو، مدارسو او ښوونځیو قدرمن استادان باید خپل زده کوونکي وهڅوي چې نیالګي کېنوي، ساتنه او پالنه یې وکړي.
له قدرمنو ملي سوداګرو، په مرکز او ولایتونو کې د صنعت کارانو، د فابریکو له مالکانو، د سوداګرۍ خونې له سهم لرونکو او ټولو کسبګرو څخه هیله مند یو چې د نیالګيو کېنولو ملي برنامه کې رغنده برخه واخلي او هر څوک د خپلې وسې او توان مطابق د هېواد په سمسورتیا کې خپل ایماني او وجداني مسوولیت په پوره ایماندارۍ سره ادا کړي.
د چاپېریال ساتنې ملي اداره پر ټولو اړوندو وزارتونو، ټولو ولایتونو خصوصا ښاروالیو، اکاډمیکو او علمي بنسټونو، خصوصي سکتور، امنیتي او دفاعي بنسټونو باندې غږ کوي چې د سږنې پسرلي د نیالګیو کېنولو ملي کمپاین کې رغنده برخه واخلي او د هېواد د سمسورتیا او ښېرازۍ لپاره په پوره اخلاص، ملي او ایماني مسوولیت سره هلې ځلې وکړي.
د چاپېریال ساتنې ملي ادارې ۳۴ ولایتي ریاستونه به د نیالګیو کېنولو ټولو کمپانونو او برنامو کې برخه اخلي او هغه امکانات چې د دې ادارې په واک کې دي، له اړوندو ادارو سره به همکاري کوي او راپور به یې رسما مرکزي ادارې ته را استوي.
د هېواد له ټولو محترمو رسنیو څخه هيله کوو چې سر له اوسه باید داسې پروګرامونه او خپرونې جوړې کړې چې ماشومان او لویان د نیالګیو کېنولو ته متوجه، د ونو او بوټو ساتنې او پالنې ته تشویق شي او په دې تړاو پراخ رسنیز کمپاین وشي.
د نیالګیو کېنولو پروسې بریا د هېوادوالو د ټولیز خوځون پورې تړلې؛ همدا راز د یوه ښېرازه او سمسور افغانستان راتلونکی د دولتي بنسټونو او ټولو خلکو د جمعي مسوولیت پورې اړه لري؛ نو موږ ټولو ته پکار ده چې د نیالګیو کېنولو ملي پروسه کې پراخ ګډون وکړو، د کېنول شوو نیالګيو ساتنې او پالنې ته جدي پاملرنه وکړو او د یوه ښېرازه، زرغون، سمسور افغانستان او پاک چاپېریال لپاره ټول هلې ځلې وکړو او خپل ایماني او وجداني مسوولیت ادا کړو.