وروستی
خــبـرتـیـا
لکه څنګه چې لیدل کیږي په هېواد کې د ا.ا.ا له فتحې وروسته د ځینو ادارو له خوا یو شمېر غوښتونکو ته چاپېریالي جوازونه صادر شوي دي.
د چاپېریال ساتنې ملي اداره د دې خبرتیا په خپرولو سره ټولو قدرمنو هېوادوالو ته خبر ورکوي چې د چاپېریال قانون د (۱۳) او (۱۶) مادو، د هوا ککړتیا د راکمولو او مخنیوي مقررې د (۱۱) مادې، د چاپېریالي اغېزو د ارزونې مقررې د (۷) مادې او د طبي زبالو مقررې د (۵) مادې په اساس د چاپېریالي جوازونو ویش او صدور د دې ادارې له ځانګړو صلاحیتونو څخه دي او نورې اړوندې ادارې چې دا کار کوي له قانون څخه سرغړونه ده او جوازونه یې د اعتبار وړ نه دي.
د چاپېریال ساتنې ملي اداره له ټولو اړوندو ادارو غواړي چې د چاپېریالي جوازونو لپاره چې کوم غوښتنلیکونه ترلاسه کوي، دې ادارې ته راجع کړي او له خپل ادرسه چاپېریالي جوازونه صادر نه کړي.
د اصنافو له فعالیتونو څارنه او تفتیش د دې ادارې له اساسي وظایفو ګڼل کیږي چې دا کار اوس د کابل ولایت د چاپېریال ساتنې ریاست پر غاړه دی؛ د نورو ادارو نظارتي ټیمونه چې د چاپېریالي مفتشینو په نوم د اصنافو له فعالیتونو څارنه کوي، د کابل ښار د اصنافو د مالکینو شکایتونه او غبرګونونه یې را پارولي دي.
د چاپېریال ساتنې ملي اداره د کابل ښار د ټولو اصنافو له مالکینو غوښتنه کوي چې یوازې هغو مفتشینو ته د نظارت او څارنې اجازه ورکړي چې د دې ادارې د چاپېریالي مفتشینو کارتونه ولري.