وروستی
د چاپېریال ساتنې ملي ادارې عمومي رییس بلخ ته لاړ
شاه زمان میوندي د چاپېریال ساتنې ملي ادارې عمومي رییس، نن د سه شنبې په ورځ د یو رسمي سفر په لړ کې بلخ ته لاړ. مولانا جلال الدین محمد بلخي هوایي ډګر ته تر ننوتلو وروسته؛ د بلخ د ولایتي شورا رییس، ملي امنیت امر، اطلاعات او فرهنگ رییس او د دې ولایت د زیات شمېر دولتي ادارو د رییسانو له خوا د ښاغلي میوندي هرکلی وشو. د چاپېریال ساتنې ملي ادارې عمومي رییس او ورسره پلاوی یې د زیارت او درنښت پر ځای کولو په موخه مبارکې روضې ته لاړل او د روضې د جامع جومات، کتابتون او موزیم لیدنه یې وکړه. همداسې ښاغلی میوندي نن تر غرمې وروسته د نظارت په موخه چاپېریالیزې قوریې ته لاړ او له نږدې څخه یې دا پروژه وکتله. د چاپېریال ساتنې ملي ادارې عمومي رییس به د بلخ لرغوني ښار ته د خپل سفر په لړ کې د دې ولایت نور مهم چاپېریالیز موضوعات وڅېړي او په اړه یې اړینې پرېکړې وکړي.