وروستی
لغمان کې د نیالګیو کینولو کمپاین په دوام د چاپېریال ساتنې ریاست لخوا نیالګي کېنول شول
۱۴۴۴کال د رجب ۲۱مه - لغمان
لغمان ولایت کې د نیالګیو کېنولو کمپاین په دوام د نيالګیو کینولو ملي ورځ د دې ولایت د چاپېریال ساتنې ریاست له لوري په مهترلام ولایتي روغتون کې د یوشمیر نیالګیو په کینولو سره ولمانځل شوه چې پکې یو شمیر سیمه ییزو مسوولینو هم ګډون کړی وو.
د لغمان ولایت چاپیریال ساتنې رئیس حاجي احمدشاه ابراهیم په پیل کې د ګډونوالو هرکلی وکړ او په خپله وینا کې یې وویل چې دوی د نیالګیو کینولو ملي ورځ لمانځل نن له مهترلام ولایتي روغتون څخه پیل کړه او د نیالګیو کینولو لړۍ به تر ولسوالیو هم ورسوي ترڅو لغمان نور هم سرسبز او ښکلی شي.
نوموړي وویل: د نیالګیو کېنولو کمپاین به روان وي او څارنه به یې هم وخت پروخت کوي، ده د لغمان پر ولسونو هم غږ وکړ ترڅو د ټولو کینول شویو بوټو وخت پروخت څارنه وکړي او پرینږدي چې وچ یا هم د حیواناتو لخوا وخوړل شي.
د امربالمعروف رئیس د دیني ارشاداتو په رڼا کې د نیالګیو په ارزښت خبرې وکړې او له ټولو ولسونو یې وغوښتل چې د ملي، دیني او وطني احساس له مخې نیالګي کینوي او ساتنه یې وکړي.
یاد مراسم د اړوندو ولایتي ادارو د ټولو رئیسانو له لوري د یوه یوه نیالګي په کېنولو او د افغانستان د ښېرازۍ په دعایې سره پای ته ورسیدل.
