وروستی
د نيالګيو کېنولو ملي کمپاين د همغږۍ او مشورتي غونډه ترسره شوه
۱۴۴۴کال د رجب ۲۸مه - کابل
د چاپېریال ساتنې ملي ادارې مسلکي او پالیسي معین ډاکټر زین العابدین عابد په مشرۍ د دې ادارې د بند امیر غونډو په تالار کې د نيالګيو کېنولو ملي کمپاين د همغږۍ او مشورتي غونډه ترسره شوه چې پکې د کرنې اوبو لګولو او مالدارۍ وزارت د طبیعي منابعو عمومي رئیس مولوي عبدالاحد خلیل، د کابل ښاروالۍ د سرسبزۍ رئیس مولوي عبدالوکیل، د کلیو پراختیا او بیارغونې وزارت اداري رئیس محمود الله او د دې ادارې د طبیعي میراثونو د ساتنې رئیس حامد صافي ګډون کړی وو.
غونډه دقران عظیم الشان د مبارکو آیتونو په تلاوت پیل او د دې ادارې مسلکي معین ګډون والو ته ښه راغلاست ووایه او زیاته یې کړه: په مرکز او ولایتونو کې د نیالګیو کېنولو ملي کمپاین ترسره کول د ټولو اړوندو ادارو مسوولیت دی؛ نوموړي وویل: که موږ ډیر نیالګي کېنوو او ساتنه یې وکړو دا په دې معنی ده چې د کاربن ډای اکسایډ له ناوړه اغېزو څخه به مو د هېوادوالو روغتیا ساتنه کړې وي.
په دې غونډه کې د کرنې اوبو لګولو او مالدارۍ وزارت په استازیتوب مولوي خلیل په راتلونکي پسرلي کې د ۳۴/۵ میلیونه نیالګیو او د کابل ښاروالۍ په استازیتوب مولوي متوکل د ۶سوه زرو نیالګیو د کېنولو ژمنه وکړه.
له هر اخیز بحث ورسته د سږ کال د نیالګیو کېنولو ملي کمپاین لپاره (د بریا او پرمختګ نیالګی) د شعار په توګه و ټاکل شو.