وروستی
د چاپېریال ساتنې ملي ادارې مسلکي معین د کندهار له والي سره وکتل
د چاپيريال ساتنې ملي ادارې مسلکي معین، انجنیر عزت الله صدیقي د یو پلاوي په مشرۍ د اقلیمي بدلون نړیوالې اونۍ لمانځنې په پار کندهار ولایت ولایت ته سفر کړی چې د سفر په لړ کې یې د کندهار له والي حیات الله حیات سره وکتل. په دې سفر کې د چاپيریال ساتنې ملي ادارې د بشري سرچینو رئيس احمد مسعود سېلاب، د کندهار د چاپيریال ساتنې رئيس انجنیر امان الدین حمیدي او د ملګرو ملتونو د د چاپيريال پروګرام يا UNEP مسئولینو هم د مسلکي معین ملتیا کوي. د چاپېریال ساتنې ملي ادارې مسلکي معین د خپل ادارې د فعالیتونو او تر لاس لاندې پروګرامونو په اړه د کندهار والي سره معلومات شریک کړل او مننه يې ترې وکړه چي د چاپېریال ساتنې برخه ته يې ځانګړې پاملرنه کړې ده. د کندهار والي هم راغلی پلاوي ته ښه راغلاست ووایه او د چاپيريال ساتنې په برخه کي يې د هر راز همکارۍ ژمنه وکړه.