په کابل سیند او نورو عامه ځایونو کې د فاضلابو تخلیه کول منع دي

۱۴۴۵کال د مُحرم ۶نېټه/ کابل
د چاپېریال ساتنې ملي ادارې مفتشینو د دولتي ادارو او لوړپوړیزو ودانیو د فاضلابو او سپتیک څاه ګانو نظارت په لړ کې تېره ورځ د انتاني روغتون، ملي آرشیف او کابل ولایت او همداراز د ۴سوداګریزو مارکیټونو او خوشحال خان مېنې ۱۶ بلاکونو د فاضلابو له سیسټمونو او سپتیک څاه ګانو څخه نظارت وکړ.

د چاپېریالي چارو مفتشینو د روغتونو او دولتي ادارو د فاضلابو او سپتیک څاه ګانو مسوولینو ته چاپېریالي اصول بیان کړل او سپارښتنه یې ورته وکړه چې د هوا، اوبو او خاورې ککړتیا د مخنیوي په موخه دې خپل فاضلاب په سمه توګه مدیریت کړي؛ ترڅو د چاپېریال د ککړتیا او هېوادوالو د آزار او اذیت سبب و نه ګرځي.

همداراز د ۴ سوداګریزو مارکیټونو له مسوولینو لیکلې ژمنې واخیستل شوې چې خپل فاضلاب به په ټاکل شویو ځایونو کې خالي کوي؛ د خوشحال خان مېنې بلاکونو مسوولینو هم ژمنه وکړه چې د دې ښارګوټي فاضلاب به بیځایه نه تشوي او کوم ځایونه چې د چاپېریال ساتنې ملي ادارې لخوا د فاضلابو لپاره ټاکل شوي ، هلته به یې خالي کوي.
د یادونې وړ ده چې په کابل سیند، کرنیزو ځمکو او په عامه ځایونو کې د فاضلابو تخلیه کول منع دي؛ که هر چا په دې کار لاس پورې کړ اصولي چلند ورسره کیږي.

Jul 24, 2023