وروستی
د طبي زبالو د تنظیم کمېټې غونډه وکړه
۱۴۴۵کال
د ربیع الثاني ۱۰مه/کابل
د چاپېریال ساتنې
ملي ادارې د مالي او اداري چارو معین مولوي عبدالسلام حقاني په مشرۍ د طبي زبالو د
تنظیم کمېټې د دې ادارې د بند امیر د غونډو په تالار کې دویمه ناسته وکړه چې پکې د
عامې روغتیا وزارت، ښار جوړونې وزارت، اټومي انرژۍ کمیسون او کابل ښاروالۍ استازو،
کابل طبي پوهنتون استادانو او د دې ادارې متخصصینو ګډون کړی وو.
غونډه د قران عظیم الشان د مبارکو آیتونو په تلاوت پیل شوه
او ورپسې د دې ادارې د مالي او اداري چارو معین مولوي عبدالسلام حقاني ګډونوالو ته
ښه راغلاست ووایه او د طبي زبالي د زیانونو او مدیریت په هکله یې هر اړخیزه وینا
وکړه. نوموړي په خپلو خبرو کې وویل: موږ په دې هڅه کې یو چې خطرناکې او طبي زبالې
په سمه توګه کنټرول او مدیریت شي، خطرناکې زبالې باید داسې ځای ته انتقال او محو
شي چې انسانانو، حیواناتو او نباتاتو ته یې ضرر و نه رسیږي او خلکو ته باید د طبي
او خطرناکو زبالو په هکله عامه پوهاوی ورکړل شي.
ښاغلي حقاني وویل: موږ د هېوادوالو د خدمت لپاره مسوول ټاکل
شوي یو او باید خپل ملت ته په پوره اخلاص کار او خدمت وکړو. ده ډاډ ورکړ چې د چاپېریال
ساتنې ملي اداره ژمنه ده چې د چاپېریالي ستونزو د حل لپاره هلې ځلې کوي.
د غونډې په لړ کې د کمېټې غړو د طبي او خطرناکو زبالو د محو
او سوځولو، انتقال او له ښار څخه لرې د ځای مشخص کېدو په تړاو هر اړخیز بحث وکړ.
د یادولو وړ ده چې د طبي زبالو د تنظیم کمېټې لومړنۍ غونډه
چې د روان ۱۴۰۲کال
د ۴میاشتې
په ۳مه نېټه
ترسره شوې وه د کمېټې غړو پرېکړه کړې وه چې د چاپېریال ساتنې ملي ادارې په مشرۍ دې
د اړوندو ادارو د باصلاحیته استازو په شمول یوه ځانګړې کمېټه جوړه شي او ګام په ګام
دې په کابل ښار کې د طبي او خطرناکو زبالو د محو کولو لپاره ځانګړي سټېشن جوړولو
چارې ترسره کړي.
اوس چې طبي زبالې په معیاري توګه نه محو کیږي او د ډول ډول
چاپېریالي او روغتیايي ستونزو لامل دي، د دې خطرناکې ستونزې د حل لپاره کار پیل شوی
او د ټولو روغتیايي مرکزونو سروې پیل شوې چې د سروې له بشپړیدو وروسته به د طبي
زبالو د محو کولو لپاره به یوه جامع طرحه جوړه او عملي شي.