وروستی
د ځنګلونو او وحشي ژوو د ساتنې او ښکار د مخنیوي په تړاو د پکتیا ولایت په کچه لویه غونډه وشوه
۱۴۴۵کال
د جمادي الثاني ۷مه/
پکتیا
د پکتیا ولایت د چاپېریال ساتنې ریاست او اړوندو امارتي
ادارو په همکارۍ د ځنګلونو او وحشي ژوو د ساتنې او همدا راز د ریاست الوزرا عالي
مقام د (۱۱۴) ګڼه
حکم چې د ښکار د مخنیوي په هکله دی، د تطبیق په موخه د ۱۴۰۲کال د لیندۍ په ۲۷مه نېټه په پکتیا ولایت کې لویه
مشورتي غونډه ترسره شوه چې پکې د ۱۳
ولسوالیو ولسوالانو، د ولسوالیو امنیتي او کشفی مسولینو، قومي مشرانو، ځوانانو او
د اړونده دولتي ادارو مسوولینو ګډون کړی وو.
د پکتیا ولایت د چاپېریال ساتنې رئیس مولوي عبدالهادي هدایت
د ځنګلونو او وحشي ژوو د اهمیت په هکله وینا وکړه او له امنیتي مسوولینو یې وغوښتل
چې د ځنګلو او وحشي ژوو ساتنې ته جدي پاملرنه وکړي او د ښکار د مخنیوي په برخه کې
کوټلي اقدامات وکړي او هر هغه څوک چې سرغړونه کوي د قانون منګولو ته یې وسپاري.
د غونډې په لړ کې د ا.ا.ا د ریاست الوزرا عالي مقام د ( ۱۱۴) ګڼه حکم د تطبیق، د ښکار د
مخنیوي، ځنګلونو او وحشي ژوو د ساتنې په هکله ولایتي مسوولینو ته د مشرانو لخوا
سپارښتنې وشوې؛ ټولو ګډونوالو د یاد حکم د تطبیق او د ځنګلونو او وحشي ژوو د ساتنې
په هکله مشرانو ته ډاډ ورکړ او ژمنه یې وکړه چې په دې تړاو به جدي هلې ځلې کوي.
د یادولو وړ ده چې په ټول هېواد کې د ځنګلونو وهل او قاچاق
په مطلق ډول بند دی او همدا راز د وحشي ژوو، مارغانو، کبانو او ټولو هغو حیواناتو
چې نسل یې د ورکېدا له ګواښ سره مخ دی؛ ښکار او قاچاق یې منع دی. هر هغه څوک چې له
دې امر څخه سرغړونه وکړي د قانون منګولو ته به وسپارل شي.