د تېرې اونۍ په لړ کې د کابل ښار په بېلابیلو ناحیو کې د ۱۸۱ مختلفو اصنافو له فعالیتونو نظارت شوی

۱۴۴۵کال د رمضان ۲مه/ کابل
د چاپېریالي اصولو د تطبیق او هواککړتیا راکمولو په موخه د چاپېریال ساتنې ملي ادارې نظارتي ټیمونو د تېرې اونۍ په لړ کې د کابل ښار په ۱،۲،۳،۴،۵،۶،۱۰،۱۲ او ۱۳ناحیو کې د کلینیکونو، رستورانتونو، د لوړپوړیزو ودانیو د فاضلابو، حمامونونو، قصابیو، نانوایانو، لبنیات پلورونکو، قنادیو، د موټرو تم ځایونو او کلچه پزیو  له فعالیتونو څخه څارنه کړې ده.

د نظارت په لړ کې د ذکر شوو اصنافو مسوولینو ته چاپېریالي ستونزې ور په ګوته شوې او لیکلې ژمنې ترې واخیستل شوې چې خپل فعالیتونه به معیاري کوي او که د بیاځلي نظارت په صورت کې که چاپېریالي سرغړونې ولیدل شي اصولي چلند به ورسره وشي.

د دې ادارې مفتشینو د یاد اصنافو مسوولینو ته د چاپېریال قانون او مقرراتو په هکله لازم معلومات ورکړل او سپارښتنې یې ورته وکړې چې خپل فعالیتونه د چاپېریالي اصولو مطابق عیار کړي.
هغه فعالیتونه چې په خپلو ورځنیو چارو کې د چاپېریالي اصولو او مقرراتو څخه سرغړونه وکړي د قانون منګولو ته به وسپارل شي.

د چاپېریال ساتنې ملي اداره له ټولو هېوادوالو غواړي چې چاپېریال ساتنه خپل ملي او ایماني مسوولیت وګڼي؛ د هوا، اوبو او خاورې ککړتیا په مخنیوي کې له دې ادارې سره همکاري وکړي.

Mar 13, 2024