وروستی
پکتیا ولایت کې چاپېریال ساتنې اړوندو پروژو ته باید لومړیتوب ورکړل شي
۱۴۴۵کال د ذی الحجې ۲۵مه/ پکتیا
د ا.ا.ا د چاپېریال ساتنې ملي ادارې د مالي او اداري چارو
مرستیال مولوي عبدالسلام حقاني په مشرۍ پلاوي پکتیا ولایت ته د خپل سفر په ترڅ کې
د اقتصاد ریاست د غونډو په تالار کې د پکتیا ولایت سکتوري رییسانو سره د چاپېریالي
پروژو د تطبیق په هکله غونډه وکړه.
د دې ادارې مرستیال د چاپېریال ساتنې د اهمیت په هکله خبرې
وکړې او ویې ویل چې ټولو هغو پروژو ته چې چاپېریال ساتنې ته ګټه رسوي، د ولایت په
کچه باید لومړیتوب ورکړل شي او د ولایت د انکشافي پلان په تطبیق کې مرکزي اداره تل
همکاري کوي.
ښاغلي حقاني وویل چې پکتیاوال باید د ځنگلونو ساتنې او پالنې
ته پوره پاملرنه وکړي ځکه چې زموږ هېواد د اقلیمي بدلون له ناوړه اغېزو سره مخ دی
چې ځنگلونه د چاپېریال د ښکلا، شخصي اقتصاد د لوړوالي، د هوا تازه والي او د هیواد
د آبادۍ او پرمختگ سبب گرځي چې د هیواد په گوټ گوټ کې ورته باید پاملرنه وشي.
د غونډې په لړ کې د پکتیا ولایت د چاپېریال ساتنې رئیس
مولوي عبدالهادي هدایت د یاد ولایت د چاپېریالي وضعیت په تړاو معلومات وړاندې کړل،
د چاپېریالي ستونزو یادونه یې وکړه او د یاد ولایت د چاپېریالي وضعیت د ښه والي په
تړاو یې خپل نظرونه او وړاندیزونه د ادارې له مشرتابه سره شریک کړل.
د غونډې په پای کې د ښاغلي حقاني په مشرۍ پلاوي لخوا پکتیا
ولایت کې د TLO موسسې
له لوري د چاپېریال ساتنې په برخه کې د عملي شویو پروژو څخه لیدنه وکړه.