د چاپېریال ساتنې ملي ادارې سرپرست او د مالي او اداري چارو مرستیال معرفي شول

۱۴۴۶کال د محرم ۳مه/ کابل
نن سه شنبه د ۱۴۴۶کال د محرم په ۳مه نېټه د یوې غونډې په ترڅ د چاپېریال ساتنې ملي ادارې سرپرست مولوي مطیع الحق خالص او د دې ادارې د مالي او اداري چارو مرستیال مولوي سعدالدین سعید د دې ادارې کارکوونکو ته معرفي شول.

په دې مراسمو کې د افغانستان اسلامي امارت د چارو ادارې لوی رئیس مولوي نور الحق انور، د چاپېریال ساتنې ملي ادارې مسلکي او پالیسي مرستیال ډاکټر زین العابدین عابد، د مالي او اداري چارو پخواني مرستیال مولوي عبدالسلام حقاني، رئیسانو، علمای کرامو، مسوولینو او مېلمنو ګډون کړی وو.

غونډه د قران عظیم الشان مبارکو آیتونو په تلاوت پیل او د دې ادارې مسلکي او پالیسي مرستیال ډاکټر زین العابدین عابد د ګډون‌والو هرکلی وکړ او مېلمنو ته یې ښه راغلاست ووایه. نوموړي تغیر او تبدیل د نظام اصل وباله او د تېرو مسوولینو کړنې یې وستایلې.

ورپسې د دې ادارې د مالي او اداري چارو پخواني مرستیال مولوي عبدالسلام حقاني هر اړخیزه وینا وکړه او ویې ویل چې دا اداره لا ډیر کار ته اړتیا لري؛ ځکه اوسمهال په نړۍواله کچه چاپېریالي موضوعات خصوصاً اقلیمي بدلون د غونډو د سر اجنډا وي؛ نو پکار ده چې د چاپېریالي موضوعاتو په تړاو له نړۍوالو سره تعامل وشي. ښاغلي حقاني د امیر اطاعت عبادت وبللو او نوو مسوولینو ته یې مبارکي ورکړه.

 د غونډې په لړ کې د چارو ادارې لوی رئیس مولوي نور الحق انور د اسلامي نظام د بقا، پخوانیو اسلافو د تګلارو او د تېر جهادي بهیر په هکله هر اړخیزه وینا وکړه او د ښاغلو مولوي مطیع الحق خالص او مولوي سعدالدین سعید د ټاکل کېدو حکم یې ګډونوالو ته ولوسته.

د چاپېریال ساتنې ملي ادارې نوي سرپرست مولوي مطیع الحق خالص عالمانه وینا وکړه او په خپلو خبرو کې یې وویل: افغانستان کې د تېرو څو لسیزو جګړو ناخوالو او د دې مظلوم ملت اړتیاوو ته په کتو که شپه او ورځ دې وطن ته خدمت وشي؛ نو کمه به وي.

ښاغلي خالص د پخوانیو مسوولینو خدمتونه وستایل او زیاته یې کړه چې کوم خطوط د هغوی لخوا ترسیم شوي هغو ته به انکشاف ورکړي او موږ ټول به په ګډه د ملت د هوساینې لپاره مثبت قدمونه اخلو. نوموړي د مشرتابه له اعتماد څخه مننه وکړه او ژمنه یې وکړه چې خپله دنده به په پوره اخلاص ترسره کوي.

د دې ادارې د مالي او اداري چارو مرستیال مولوي سعدالدین سعید هم وینا وکړه او ویې ویل چې د اسلامي امارت اصل په اطاعت باندې بنا دی؛ نو کوم کار چې موږ ته راسپارل کیږي، نو ذهناً او قلباً به یې منو. ده له مسوولینو او  کارکوونکو هیله وکړه چې په کارونو کې یې په پوره اخلاص ملاتړ وکړي.

غونډه د دعایې په لوستلو پای ته ورسېده او د دې ادارې سرپرست او مرستیال خپلو دندو ته معرفي شول.

د یادونې وړ ده چې ښاغلي مولوي مطیع الحق خالص پخوا د سرې میاشتې ټولنې عمومي رئیس په توګه دنده ترسره کړې ده.

Jul 10, 2024