وروستی
د اقلیم بدلون سره د مبارزې د مشارکت او همکارۍ پروژې افتتاحيه غونډه ترسره شوه
۱۴۴۶کال د صفر ۲۴مه/ کابل
د چاپېریال ساتنې ملي ادارې او رها موسسې په ګډه همکارۍ نن
چهار شنبه د ۱۴۰۳کال
د سنبلې په ۷نېټه
د دې ادارې د بند امیر د غونډو په تالار کې د اقلیم بدلون سره د مبارزې د مشارکت
او همکارۍ پروژې افتتاحي غونډه ترسره شوه چې پکې د دې ادارې پالیسي او مسلکي مرستیال
ډاکټر زین العابدین عابد، رئیسانو، د رها موسسې مرستیال، کارکوونکو او متخصصینو ګډون
کړی وو.
غونډه د قران کریم مبارکو ایتونو په تلاوت پیل شوه ورپسې د
چاپېریال ساتنې ملي ادارې پالیسي او مسلکي مرستیال ډاکټر زین العابدین عابد په
خپلو خبرو کې وویل: د افغانستان اوسنی حالت ایجابوي چې د دې غریب ولس سره په هره
برخه کې مرسته او کومک وشي. نوموړي د رها موسسې له مسوولینو غوښتنه وکړه چې د چاپېریال
ساتنې ملي ادارې سره مشترک کار وکړي او له اقلیمي بدلون سره د مبارزې په برخه کې د
ټولو اقشارو سره په مشترګه مخته ولاړ شی.
ښاغلي عابد ژمنه وکړه چې د دې ادارې مرکزي او ولایتي ریاستونه
به د دې پروژې په تطبیق کې د رها موسسې سره همکاري کوي.
د دې ادارې د اقلیمي بدلون رئیس انجنیر روح الله امین د اقلیمي
بدلون سره د مبارزې په برخه کې د ظرفیت لوړونې د اهمیت په هکله خبرې وکړې او ټینګار
یې وکړ چې د اقلیمي بدلون سره د مبارزې په برخه کې باید د اړوندو ادارو مسوولینو
ظرفیت لوړ شي؛ ترڅو وکولی شو نړۍوالو مالي میکانیزمونو ته مناسب کانسیپټونه جوړ کړو.
د رها موسسې مرستیال انجنیر عزت الله صدیقي د پروژې په اړه
معلومات ورکړل او ژمنه یې وکړه چې د هرې پروژې په تطبیق کې به د ادارې سره په ګډه
کار کوي.
د غونډې په لړ کې د رها موسسې د تخنیکي ټیم له لوري د پروژې
د تطبیق د څرنګوالي په اړه هر اړخیز معلوماتي پرزنټېشن وړاندې شو.
د یادونې وړ ده چې د اقلیم بدلون سره د مبارزې د مشارکت او
همکارۍ پروژه به د ددو کلونو په موده کې په کابل او ولایتونو کې پلې شي او د اقلیمي
بدلون سره د مبارزې په برخه کې به د مختلفو خصوصي سکتورونو، امارتي ادارو، علمای
کرامو او خبریالانو د ظرفیت لوړولو تخنیکي او مسلکي روزنیز پروګرامونه ترسره شي.