د هواککړتیا راکمولو په موخه کابل ښار کې د ۹۹ فابریکو او تولیدي شرکتونو د فعالیتونو څارنه شوې

۱۴۴۶کال د ربیع الاول۲۸مه/کابل
د چاپېریال ساتنې ملي ادارې د نظارتي ټیمونو له لوري د هواککړتیا راکمولو، مخنیوي او چاپېریالي اصولو د تطبیق په موخه د تېرې یوې اونۍ په لړ کې د کابل ښار مختلفو سیمو( ۶/۱۳او۱۶ناحیو، کلکان او بګرامیو ولسوالیو، جمعه محمدي، ارغندي او ده سبز صنعتي پارکونو) کې  د ۹۹ مختلفو فابریکو : (د وسپنې ویلې کولو، درملو، غیرالکولي مشروباتو، معدني اوبو، مرمر ډبرو، سوپر کولا، صابون جوړولو، آیسکریم، لبنیاتو، کاغذي دستمالونو، فوم، خوراکي توکو، پلاستيکي پایپونو، پلاستیکي توکو، وینځونکو توکو، د مالوچو د پروسس، برېښنایي توکو، تعمیراتي رنګونو او تیزابو) تولیدي شرکتونو د فعالیتونو له څرنګوالي او چاپېریالي وضعیت څارنه او ارزونه ترسره شوه.
د نظارت په ترڅ کې د ذکر شوو فابریکو او تولیدي شرکتونو مسوولینو ته د اصلاح په موخه چاپېریالي ستونزې او نېمګړتیاوې ور وښودل شوې او د چاپېریال قانون، مقرراتو او طرزالعملونو په هکله ورته عامه پوهاوی ورکړل شو.
د چاپېریال ساتنې ملي اداره د هواککړتیا راکمولو او مخنیوي په موخه د هواککړوونکو سرچینو او ټولو فعالیتونو مسوولینو ته سپارښته کوي چې خپل فعالیتونه د چاپېریالي اصولو مطابق عیار  او ترسره کړي.
هغه فابریکې او تولیدي شرکتونه چې د دود د تصفیې فلټرونه یې غیر فعال، ویجاړ او یا هم د اوبو، هوا او خاورې د ککړتیا لامل وګرځي، له قانوني چلند سره به مخ شي.
د یادونې وړ ده چې د چاپېریال ساتنې ملي ادارې نظارتي ټیمونه په مرکز او ولایتونو کې د هواککړوونکو سرچینو څخه په دوامداره توګه څارنه کوي او هغه څوک چې له چاپېریالي اصولو څخه سرغړونه کوي د قانون منګولو ته یې سپاري

Oct 1, 2024