وروستی
د اقليمي بدلون نړيوالې اونۍ د چاپېريال ساتنې اړوند نقاشانو ته جايزې ورکړل شوې
د چاپېريال ساتنې ملي ادارې د پاليسۍ او نړيوالو اړيکو معين ادريس مليار د روان کال د تلې د مياشتې په ۷مه نېټه د يوې غونډې په ترڅ کې هغه نقاشان په ډاليو ونازول چې د اقليمي بدلون نړيوالې اونۍ په لمانځوغنډه کې يې خپلې نقاشيانې نندارې ته وړاندې کړې وې.
ښاغلي مليار نقاشان دې ادارې سره د اقليمي بدلون نړیوالې اونۍ په لمانځغونډه کې فعال همکاران وګڼل او د دوی نقاشيانې يې پر هېواد د اقليمي بدلون ناوړه اغېزو منعکس کوونکې وبللې.
ښاغلي ملیار د خپلو خبرو په ترڅ کې وويل: اقليمي بدلون زموږ په هېواد کې يو جدي ګواښ دی، چې ناوړه اغېزې يې شايد په سترګو ونه ليدل شي، خو د دې پديدې پايلې او ستونزې ورځ تربلې زموږ په ژوندانه کې څرګندېږي.
همدارنګه د دې ادارې د اطلاعاتو او عامه اړيکو رئيسې آغلې ليلا ساماني د يادې ادارې عامه پوهاوي او د برنامو جوړولو په اړه خبرې وکړې او ټينګار يې وکړ چې د خلکو د عامه پوهاوي کچې د لوړېدو لپاره د نقاشۍ هنر له لارې د پيغامونو د لېږد تاثير خورا اغېزمن دی.
د يادونې وړ ده چې په دې غونډه کې له ۵۰ څخه ډېرو نقاشانو ګډون کړی و چې له ډلې څخه يې سليمې ژکفر لومړی، مينې نايب دويم او تدبير مهربان درېيم مقامونه ترلاسه کړل چې لومړی، دويم او درېيم مقام ګټونکي په نغدي جوايزو او پاتې نور يې په ستاينلیکونو ونازول شول.
خبریال: عبدالولي عابد
عکاس: سید امید سادات