د هواککړتیا راکمولو په موخه کابل ښار کې د ۳۷ فابریکو، تولیدي شرکتونو او اصنافو له فعالیتونو څخه نظارت ترسره شو

۱۴۴۶کال د جمادي الثاني ۱۲مه/کابل
د هواککړتیا راکمولو، مخنیوي او چاپېریالي اصولو د تطبیق په موخه د چاپېریال ساتنې ملي ادارې نظارتي ټیمونو لخوا د تېرې اونۍ په لړ کې د کابل ښار ارغندي او څرخي‌پله صنعتي پارکونو کې د ۳۷ مختلفو تولیدي فابريکو : (المونیمي او پلاستیکې توکو، ویځونکو توکو، خوراکي توکو، لبنیاتو، پلاستیکي بوټانو او څپلکو، پي وي سي، بریښنایي توکو، د رنګ تولیدي شرکت او کمپل جوړولو فابریکو؛  د پیپونو، برېښنایي مزو، غیر الکولي مشروباتو، بسته بندۍ، کرنیزو توکو او سربو تولیدي شرکتونو او همدا راز معالجوي روغتونونو، د تیلو ټانګونو، هوټلونو د څارویو د ساتنې فارم او فاضلابو شرکت) د فعالیتونو د څرنګوالي او چاپېریالي وضعیت ارزونه ترسره شوه.

د دې ادارې مفتشینو د نظارت په ترڅ کې د یادو فابریکو، تولیدي شرکتونو او اصنافو مسوولینو ته د اصلاح په موخه چاپېریالي ستونزې ور په ګوته کړې؛ لازمې سپارښتنې یې ورته وکړې او همدا راز د چاپېریال قانون، مقرراتو او طرزالعملونو په هکله ېیې ورته عامه پوهاوی ورکړ او غوښتنه یې ترې وکړه چې خپل فعالیتونه د چاپېریالي اصولو او معیارونو په پام کې نیولو سره عیار او ترسره کړي.
هغه فابریکې، تولیدي شرکتونه، لوړپوړیزه ودانۍ او اصناف چې د سون‌سیسټمونو د دود د تصفیې فلټرونه یې غیر فعال، ویجاړ او یا هم غیر فعال وي، ژر تر ژره یې باید جوړ او فعال کړي، چاپېریال ساتنې ته جدي پاملرنه وکړي، د اوبو، هوا او خاورې د ککړتیا لامل باید نه‌شي.

د چاپېریال ساتنې ملي ادارې نظارتي ټیمونه شپه او ورځ په مرکز او ولایتونو کې د هواککړوونکو سرچینو (فابریکو، تولیدي شرکتونو، لوړپوړیزو ودانیو او اصنافو) له فعالیتونو څخه په دوامداره توګه څارنه کوي؛ هر هغه څوک چې له چاپېریالي اصولو څخه سرغړونه وکړي او یا هم د چاپېریال د ککړتیا لامل شي، له جدي قانوني چلند سره به مخ شي چې بیا هیڅوک د شکایت حق نه لري.

Dec 15, 2024