کابل ښار کې د هواککړوونکو سرچینو په تړاو کوټلي اقدامات ترسره کیږي

۱۴۴۶کال د رجب 7مه/کابل
د چاپېریال ساتنې ملي ادارې د نظارت او تفتیش رئیس مولوي احمد فیصل بریالي په مشرۍ شپنیو نظارتي ټیمونو له‌خوا د هواککړتیا راکمولو، مخنیوي او چاپېریالي اصولو د تطبیق په موخه د روان کال د مرغومي په ۱۷مه نېټه د شپې پر مهال د کابل ښار دریمې او پنځمې ناحیې اړوند سیمو کې د (رابعه بلخي، احمدي ټاور ګروپ، او مزمل ټاور) ۵لوړپوړیزو ودانیو د مرکز ګرمیو، سون‌سیسټمونو او د دود د تصفیې فلټرونو د فعالیتونو له څرنګوالي څخه نظارت ترسره کړ.

د نظارت په ترڅ کې د چاپېریالي چارو مفتشینو لخوا د ۳لوړپوړیزو ودانیو فعالیتونه ستونزمن و ارزول شول او له مالکینو یې لیکلې ژمنې واخیستل شوې، یوه ورځ مهلت ورکړل شو چې د دود د تصفیې فلټرونه به فعالوي او که د بیاځلي نظارت پر مهال د هواککړتیا لامل شول، له قانوني چلند سره به مخ شي چې بیا د شکایت حق نه لري.

همدا راز د دې ادارې مفتشینو لخوا د ذکر شوو ودانیو مالکینو د چاپېریال قانون او مقرراتو په هکله لازم پوهاوی ورکړل شو او سپارښتنې ورته وشوې چې خپل فعالیتونه د چاپېریالي اصولو مطابق ترسره کړي او د مرکز ګرمیو د فعالیت پر مهال به د دود د تصفیې فلټرونه فعال ساتي.

د یادونې وړ ده چې د چاپېریال ساتنې ملي ادارې نظارتي ټیمونه شپه او ورځ په مرکز او ۵ سترو ولایتونو کې د هواککړوونکو سرچینو (فابریکو، تولیدي شرکتونو، لوړپوړیزو ودانیو او اصنافو) د فعالیتونو له څرنګوالي څخه په دوامداره توګه څارنه کوي؛ هر هغه څوک چې له چاپېریالي اصولو څخه سرغړونه وکړي او یا هم د چاپېریال د ککړتیا لامل شي، له جدي قانوني چلند سره به مخ شي.

Jan 7, 2025