وروستی
د چاپېريال ساتنې ملي ادارې عمومي رئيس د باميانو له والي سره وکتل
د چاپېريال ساتنې ملي ادارې عمومي رئيس، شاه زمان ميوندي نن لړم په ۱۲مه نېټه له غرمې وروسته په خپل کاري دفتر کې د باميانو له والي ښاغلي محمد طاهر زهير سره وليدل.
ښاغلي میوندي د باميانو د والي هرکلی وکړ او دې ادارې ته يې د نوموړي له راتګ څخه خوښي څرګنده کړه. ښاغلي زهير د چاپېريال ساتنې ملي ادارې کړنې او فعاليتونه وستايل او په چاپېريالي موضوعاتو کې يې باميانو ته د يادې ادارې د عمومي رئيس د ځانګړې پاملرنې څخه مننه وکړه.
نوموړي د ساتل شويو سيمو او د بند امير ملي پارک د اهميت په اړه د معلوماتو وړاندې کولو ترڅنګ د باميانو ولايت د چاپېريال ساتنې رياست، اداري تعمير د رغونې، د ساتل شوې سيمې په توګه د باميانو پلاتيو اعلانول، د تشکيل پراختیا، د بند امير او د شاه فولادي ساتل شویو سیمو د مديريتي پلان د ښه پلي کېدو او د چاپېريالي پروژو په برخه کې د چاپېريال ساتنې ملي ادارې د لا ډېرې همکارۍ غوښټونکی شو.
وروسته د چاپېريال ساتنې ملي ادارې عمومي رئيس د چاپېریال ساتنې اړوند موضوعاتو لکه د بند امير ملي پارک او د شاه فولادي ساتل شوې سيمې په برخه کې د ښاغلي زهير له ځانګړې پاملرنې مننه وکړه، د اداري تعمير د رغونې په اړه يې نوموړي ته ډاډ ورکړ او ويې ويل: د دې ولايت د چاپېريال ساتنې ریاست د اداري تعمير د رغولو په برخه کې به هیڅ ډول امکانات و نه سپموي او په دې برخه کې به د دولتي بوديجې او يا هم له همکارو موسسو څخه بودیجه تر لاسه کړي.
ورپسې د چاپېريال ساتنې ملي ادارې مسلکي معين، انجنیر عزت الله صديقي د ساتل شويو سیمو په اړه د پلانونو او برنامو، مديريتي پلان او د ساتل شوې سيمې په توګه د نوې سيمې د اعلانولو په هکله د باميانو والي ته معلومات ورکړل.
د غونډې په پای کې پرېکړه وشوه چې تخنيکي ټيمونه به د شته پلانونو او نورو اړوندو موضوعاتو په هکله کار وکړي او په نېږدې راتلونکي کې به دې ولايت ته د چاپېریال ساتنې ملي ادارې د عمومي رئيس د سفر زمينه برابره کړي.