د چاپېریال ساتنې ملي ادارې او لوړو زده کړو وزارت ترمنځ د همکاریو هوکړه لیک لاسلیک شو

١٤٤٦کال، د رمضان المبارک دویمه نېټه/کابل
د چاپېریال ساتنې ملي ادارې او لوړو زده کړو وزارت ترمنځ د دوه اړخیزو همکاریو هوکړه لیک لاسلیک شو. دغه هوکړه لیک، چې د چاپېریال ساتنې ملي ادارې د عمومي رئیس مولوي مطیع الحق خالص او لوړو زده کړو وزیر شیخ ندامحمد ندیم له لوري لاسلیک شوی د دواړو بنسټونو د علمي او تخصصي ظرفیتونو پر ګډې ګټې اخیستنې متمرکز دی، د چاپېریال ساتنې او اقلیمي بدلون په برخو کې د څېړنو پیاوړتیا، د ملي وړتیاوو پراختیا او د عامه پوهاوي لوړولو ته ځانګړې پاملرنه کوي.
د دې هوکړه لیک له مخې، دواړه لوري به خپلې تخصصي او علمي اړیکې پیاوړې کوي، د چاپېریالي ټکنالوژۍ په برخه کې به ګډې څېړنې ترسره کوي او د چاپېریال ساتنې فرهنګ بنسټیز کولو او عامه پوهاوي لپاره به علمي سمینارونه، ورکشاپونه او کنفرانسونه تنظیموي.
د هوکړې پر بنسټ، د چاپېریال ساتنې ملي اداره مکلفه ده چې د لوړو زده کړو موسسو محصلینو او علمي کادر ته د عملي کار فرصتونه برابر کړي، د چاپېریال ساتنې او اقلیمي بدلونونو اړوند ملي او نړیوالو ناستو کې د ګډون زمینه برابر کړي او د تحصیلي نصاب د پراختیا لپاره تخنیکي مشورې ورکړي. همدارنګه، یاده اداره به د تحصیلي نهادونو لپاره د نیالګیو وېشلو، د محصلینو د مونوګرافونو او تېزیسونو د ملاتړ او د څېړنیزو فعالیتونو د اسانتیاوو برابرولو په برخه کې همکاري کوي.
په ورته وخت کې، د لوړو زده کړو وزارت مکلف دی چې د چاپېریال ساتنې ملي ادارې له څېړنیزو پروژو سره علمي همکاري وکړي، محصلین او علمي کادر د چاپېریال ساتنې اړوند څېړنو او مقالو لیکلو ته وهڅوي او د اړتیا په صورت کې د یادې ادارې متخصصینو ته د علمي فعالیتونو لپاره لازم شرایط برابر کړي.

Mar 2, 2025