میدان وردګو ولایت کې د نیالګیو کېنولو په تړاو د همغږۍ غونډه ترسره شوه

۱۴۴۶کال د رمضان المبارک ۱۰مه/ میدان وردگ
د چاپېریال ساتنې ریاست له لوري د ۱۴۰۴کال د نیالګیو کېنولو دکمپاین په تړاو د میدان وردګو  والي قاري بختیار په مشرۍ د دې ولایت د غونډو په تالار کې د امارتي ادارو ، پانګوالو او موسساتو له استازو سره د همکارۍ او هغږۍ غونډه ترسره شوه.
غونډه د قرانکریم د څو مبارکو ایتونو په تلاوت سره پیل شوه ورپسې د میدان وردګو والي قاري بختیار معاذ د نیالګیو کېنولو، ساتنې او پالنې په اړه هر اړخیزه وینا وکړه. نوموړي د ولایتي ادارو تر منځ د نیالګیو د کېنولو د همغږۍ او چمتووالي په غونډه کې ټینګار وکړ چې د ادارو مسؤلین باید د ډېرو نیالګیو د کېنولو پر ځای د هغوی پالنې، ساتنې او اوبو رسولو ته جدي پاملرنه وکړي.

ښاغلي معاذ د ارشاد، حج او اوقافو، علماؤ شورا، اطلاعاتو او فرهنګ او ملي راډیو تلویزیون له مسؤلینو وغوښتل چې د اسلام او ساینس له نظره د نیالګیو د ارزښت په اړه عامه پوهاوی زیات کړي، ترڅو خلک د زرغون چاپېریال په ارزښت پوه شي.
د میدان وردګو والي د دولتي ادارو مسؤلینو، پانګوالو او مؤسساتو استازو ته سپارښتنه وکړه چې د نیالګیو د کېنولو په ملي کمپاین او د چاپېریال زرغونتیا کې له اړوندو ادارو سره همکاري وکړي، څو راتلونکی نسل یو پاک او زرغون چاپېریال ولري.

همداراز د چاپېریال ساتنې رئیس مولوي الله محمد ذاکر د نیالګیو دکینولو په اړه د غونډې ګډونوالو ته معلومات وړاندې کړل او جوړ شوی عملیاتي پلان یې ورسره شریک کړ او هم یې له ګډونوالو غوښتنه وکړه چې د نیالګیو کېنولو په کمپاین ک د چاپېریال ساتنې ریاست سره همکاري وکړي او خپل کارمندان وهڅوي ترڅو یو یو نیالګی د هیواد دښېرازۍ او زرغونتیا لپاره کېنوي، په ورته مهال کې د چاپېریال ساتنې ریاست د اطلاعاتو او عامه پوهاوي عمومي مدیر عزیزالله سعادت له لوري د اسلام او ساینس له نظره د نیالګیو د ارزښت، د ولایتي کمېټې د مسؤلیتونو، او د نیالګیو د پالنې او ساتنی په اړه هر اړخیز معلوماتي پرېزنټېشن وړاندې کړ.

دغه راز د ادارو مسؤلینو، پانګوالو او مؤسساتو استازو ژمنه وکړه چې د نیالګیو د کېنولو ملي کمپاین کې به په ټول ولایت کې شاوخوا ۳۰ زره میوه لرونکې او غیر میوه لرونکې نیالګي او بوټي کېنوي. همدارنګه، د غونډې ګډونوالو د غرنیو سیمو د ځنګلونو ساتنې، د نیالګیو د پالنې، او د هغوی د اوبو رسولو پر اړتیا ټینګار وکړ، او اړوند ادارو ته یې د چمتووالي سپارښتنې وکړې.

Mar 10, 2025