وروستی
د اقلیمي بدلون پر وړاندې د مبارزې لپاره افغانستان ته د ۱۰ میلیونه ډالرو په ارزښت بودجه تصویب شوه
کابل،
۱۶ د رمضان المبارک، ۱۴۴۶
د چاپېریال ساتنې او د ځایي ټولنو د ژوند د ښه والي په برخه
کې، یو مهم ګام اخیستل شوی، چې "د ټولنې پر بنسټ د اقلیم بدلون ته د ځواب ویلو
پروژه د ځنګلونو کرنې او د معیشت ښه والي له لارې" تمویل شوې ده.
یاده پروژه، چې ارزښت یې 9.98 میلیونه ډالره دی، د نړیوال
چاپېریالي اسانتیاوو صندوق (GEF) له
لوري د کم پرمختللو هېوادونو د صندوق (LDCF) په
شورا کې تصویب شوه.
د دې بودجې له مجموعي اندازې څخه، 8.98 میلیونه ډالره د نړیوالو
چاپېریالي اسانتیاوو GEF له
لوري او 1 میلیونه ډالر د ملګرو ملتونو د انکشافي پروګرام
(UNDP) د داخلي مالي همکارۍ
(Co-Finance) له لارې برابرېږي.
یاده پروژه به د پنځو کلونو لپاره د بدخشان او کنړ په ولایتونو
کې پلې کېږي، چې موخه یې د ځایي ټولنو د اقلیم بدلون پر وړاندې مقاومت زیاتول او د
هغوی معیشت ښه کول دي.
د دې پروژې تطبیق د ملګرو ملتونو د انکشافي پروګرام (UNDP) له لوري د چاپېریال ساتنې ملي
ادارې او نورو اړوندو ادارو په همکارۍ ترسره کېږي.
ذکر شوې پروژه ګڼ فعالیتونه لري، چې عبارت دي له:
د انعطاف وړ کرنې ترویج او د زیانمنو ځمکو احیا، د ټولنو د
مقاومت لوړول او د معیشت ښه کول، د تخریب شویو ځنګلونو بیا رغونه او د طبیعي سرچینو
دوامداره مدیریت، د اوبو او خاورې ساتنه او د اوبولګولو سیسټمونو ښه والی، د وچکالۍ
پر وړاندې د مقاومو نباتي انواعو معرفي کول، د څړځایونو او علفچرونو پراخول، د کرنیزو
تولیداتو زیاتوالی او د اوبولګولو عصري سیستمونه رامنځته کول، لکه چکډیمونه، د
قطرهیي اوبولګولو سیستم، د سېلاب ضد محافظتي دیوالونو او د اوبولګولو کانالونو جوړول
په یاده پروژه کې شامل دي
دا پروژه د چاپېریال ساتنې ملي ادارې او د ملګرو ملتونو د
انکشافي پروګرام (UNDP) د ګډو
هڅو پایله ده او د اقلیم بدلون پر وړاندي د مبارزې او د هېواد د طبیعي سرچینو د
ساتنې په برخه کې یو مهم ګام بلل کېږي. تمه کېږي، چې د دې پروژې پلي کېدو سره، نه یوازې
د چاپېریال وضعیت ښه شي، بلکې د ځایي ټولنو د ژوند سطحه هم لوړه شي.