وروستی
د تاجکستان او افغانستان تر منځ د چاپېریالي همکاریو د تفاهمنامې پر مسوده خبرې اترې
د چاپېریالي همکاریو د تفاهمنامې پر مسوده او دوه اړخیزه مرستو په تړاو د چاپېریال ساتنې ملي ادارې او تاجکستان هېواد د چاپېریال ساتنې کمېټې تر منځ د روان میاشتې پر ۱۳مه نېټه، په کابل کې د ملګرو ملتونو د غونډو په تالار کې خبرې وشوې.
په دې غونډه کې د چاپېریال ساتنې ملي ادارې مسلکي معین انجنیر عزت الله صدیقي، د تاجکستان هېواد د د هیات رییس کریم جان عبدالله موف، د بهرنیو چارو او مالیې وزارتونو لوړ پوړو استازو، د ملګرو ملتونو(UNEP) د چاپېریال ساتنې دفتر، نړیوال بانک، د چاپېریال ساتنې شبکې(ZOI)، مدني ټولنو او همکارو موسسو ګډون کړی وو.
د ناستې په پیل کې د چاپېریال ساتنې ملي ادارې مسلکي معین انجنیر عزت الله صدیقي د دواړو هېوادونو پر دوستانه هیله مندۍ خبرې وکړې او ویې ویل: د دواړو هېوادونو د دوه اړخیزه همکاریو د اووم پروتوکول له مشخصاتو یو هم د چاپېریالي همکاریو دتفاهم نامې پراختیا ده، چې نن به د یادې تفاهمنامې په اړه، چې مخکې جوړه شوې ده کار وکړو.
ورپسې د تاجکستان هېواد هیاتي رییس د دواړو هېوادونو تر منځ د چاپېریال ساتنې د همکاریو په برخه کې د تېرو اړیکو په اړه خبرې وکړې او د دغې تفاهنامې لاسلیک یې د افغانستان او تاجکستان هېوادونو تر منځ د چاپېریال ساتنې په برخه کې یو مهم ګام وباله.
په یاده ناسته کې ګډونوالو د یادې تفاهنمامې د مسودې پر ټول ګټو باندې خبرې وکړې او خپل علمي او مسلکي نظریات یې شریک کړل، د مسودې متن له تخنیکي اړخه اماده او وروسته دیپلوماتیکو مراجعو له تایید وروسته به لاسلیک شي.
د یادونې وړ ده چې دغه تفاهمنامه به په نهو میاشتو کې پای ته ورسیږي، چې د وحشي ژویو، اقلیمي بدلون، د نړیوالو چاپېریالي هوکړه لیکونو د تطبیق د څرنګوالي مدریت، چې دواړه هېوادونه پکې غړيتوب لري د ګډو پلانونو او لارو چارو په ترسره کولو به د افغانستان او تاجکستان هېواد چاپېریالي سیر کې به د پام وړ بدلون رامنځته کړي.