وروستی
د کابل ښار اوومه ناحیه کې د سیند د پاکوالي حشر ترسره شو
١٤٤٦کال د ذوالحجې٢٥مه/ کابل
د کابل ښار ۷مې
ناحیې اړوند د چهلستون سیند په اوږدو کې د چاپېریال ساتنې ملي ادارې او کابل ښاروالۍ
په همغږۍ د پاکوالي عمومي حشر ترسره شو.
دا پروګرام د علماوو، قومي مشرانو، د ګذر وکیلانو، ځوانانو
او یو شمېر تولیدي شرکتونو په همکارۍ ترسره شو، چې موخه یې د چاپېریال ساتنې فرهنګ
ترویج او د خلکو د مشارکت هڅونه وه.
د پروګرام پیل د قرآن کریم د مبارکو آیتونو په تلاوت وشو،
وروسته بیا د چاپېریال ساتنې ادارې د نظارتي چارو کارپوه عبدالامیر مبارز، د کابل ښاروالۍ
د عامه پوهاوي عمومي مدیر حاجي محمود واحدي، علماوو او مشرانو د چاپېریال ارزښت او
د خلکو د ونډې په اړه خبرې وکړې.
ویناوالو د پاکوالي دا ډول پروګرامونه اغېزناک وبلل او له
مسؤلینو یې غوښتنه وکړه چې د عامه پوهاوي نور پروګرامونه هم طرحه او تطبیق کړي، ترڅو
ښاریان د ښار په پاک ساتلو کې فعاله برخه واخلي.
د پروګرام په پای کې د ښاروالۍ تنظیفي ټیمونو او د سیمې اوسیدونکو
په ګډه د چهلستون سیند په مختلفو برخو کې د پاکوالي عمومي کمپاین ترسره کړ.