د چاپېریال ساتنې ملي ادارې له لوري د رها موسسې په همکارۍ د علمای کرامو سره مشورتي ورکشاپ ترسره شو

١٤٤٧کال د محرم الحرام ٤مه/ کابل
د چاپېریال ساتنې ملي ادارې له لوري د رها موسسې په همکارۍ د هېواد له مخکښو دیني علماو سره د چاپېریالي وضعیت د ارزونې راپور جوړولو په تړاو مشورتي ورکشاپ ترسره شو.
د یاد ورکشاپ موخه دا وه، چې د افغانستان د چاپېریالي وضعیت د ارزونې راپور د چمتو کولو په لړ کې د دیني علماو لیدلوري، نظریات او رغوونکي وړاندیزونه راټول شي، ترڅو دا راپور یوازې علمي او تخنیکي نه، بلکې د ولس د باورونو او ارزښتونو برخه هم وي.
ورکشاپ د چاپېریال ساتنې ملي ادارې د عمومي رئیس، مولوي مطیع‌الحق خالص، په پرانیستونکې وینا پیل شو.

ښاغلي خالص د اسلام له نظره د چاپېریال پر ارزښت ټینګار وکړ او ویې ویل اوبه، هوا، ځنګلونه، حیوانات او نباتات د خدای (جل جلاله) نعمتونه دي، چې انسان ته د امانت په ډول سپارل شوي. د دوی ساتنه نه یوازې قانوني، بلکې ديني او اخلاقي مسؤلیت هم دی."
نوموړي دیني عالمان د ټولنې روحاني مشران وبلل او څرګنده یې کړه چې هغوی کولای شي د منبر، مدرسو، خطبو او د دیني رسالت له لارې د پاک چاپېریال پیغام تر خلکو ورسوي.
هغه زیاته کړه: کله چې د دین په ژبه چاپېریالي پیغام خلکو ته ورسول شي، هغوی دا الهي امر ګڼي او خپل چلند ورباندې بدلوي. زموږ موخه دا ده چې د چاپېریال ساتنه یوازې اداري موضوع نه، بلکې د ایمان برخه وګرځوو.

ښاغلي خالص د اقلیمي بدلون پر بدو اغېزو هم خبرې وکړې او ویې ویل چې افغانستان، سره له دې چې د نړیوال اقلیمي بدلون په رامنځته کېدو کې خورا لږ رول لري، خو اغېزې یې دلته خورا جدي دي. د حرارت درجې لوړوالی، پرله‌پسې وچکالۍ، د کرنیزو حاصلاتو کمښت، د څښاک د اوبو کموالی او د ژویو کډوالۍ هغه ننګونې دي چې اوسنی او راتلونکی نسل یې له سختو خطرونو سره مخ کړی دی.
نوموړي له ټولو ولسي او دیني قشرونو، قومي مشرانو او امارتي ادارو غوښتنه وکړه، چې د طبیعي منابعو د ساتنې، د اوبو سپما او د ونو د کرنې په برخو کې عملي اقدامات وکړي.
په ورکشاپ کې د ارشاد، حج او اوقافو وزارت د دعوت او ارشاد رئیس، شيخ سعیدالرحمن بغلاني، د علمای کرامو په استازيتوب خبرې وکړې. نوموړي د دین له نظره د چاپېریال ساتنې پر ارزښت او د علماو پر مسؤلیت ټینګار وکړ.
همداراز، د رها موسسې مرستیال انجنیر عزت‌الله صدیقي د افغانستان د چاپېریالي وضعیت د ارزونې راپور د تخنیکي جوړښت، هدفونو او معلوماتو د راټولولو پروسې په اړه تفصیلي معلومات وړاندې کړل. نوموړي وویل چې یاد راپور به د اقلیمي بدلون پالیسیو جوړولو، تصمیم نیونې او د انطباقي پروګرامونو لپاره مهم بنسټیز سند وي.

د ورکشاپ په پای کې د رها موسسې له لوري یو لړ تخنیکي او علمي پرزنتېشنونه هم وړاندې شول، چې پکې د علماو د نظرونو د اخیستو او د چاپېریال د اصلاح لارې مطرح شوي وې.

Jun 30, 2025