وروستی
د چاپېریال ساتنې ملي ادارې عمومي رئیس کندوز ته د سفر په ترڅ کې د ولایت د مرستیال سره وکتل
١٤٤٧کال د صفرالمظفر ١٧مه/ کندوز
د چاپېریال ساتنې ملي ادارې عمومي رئیس مولوي مطیعالحق
خالص او ورسره مل پلاوی کندوز ولایت ته د سفر پر مهال د یاد ولایت له مرستیال
مولوي حبیب الرحمن صهیب سره وکتل او د چاپېریال د خوندیتوب، اقلیمي بدلون او عامه
پوهاوي په اړه یې بحث وکړ.
په دې کتنه کې د چاپېریال ساتنې اړوند ملي او ولایتي پروګرامونه،
د چاپېریال د ککړتیا د مخنیوي لارې چارې، د ښارونو د شنو ساحو پراختیا، د اوبو د
سرچینو د ساتنې او د خلکو د چاپېریالي پوهاوي د لوړولو موضوعات تر بحث لاندې ونیول
شول.
ښاغلي خالص د کندوز د چاپېریال ساتنې په برخه کې د ترسره شویو
کارونو ستاینه وکړه او ټینګار یې وکړ چې د ولایتي ادارې، اړوندو ادارو او خلکو
ترمنځ ګډ کار کولای شي د چاپېریال د ښه والي لپاره اغېزمنې پایلې ولري.
د کندوز ولایت مرستیال د چاپېریال ساتنې ملي ادارې له هڅو
مننه وکړه او ډاډ یې ورکړ چې د چاپېریال د ساتنې او پرمختګ لپاره به اړوندې ادارې
او ولس په ګډه همکاري وکړي.
یاد سفر د چاپېریال د ساتنې په برخه کې د ګډو عملي ګامونو د
پورته کولو په هدف ترسره شو