وروستی
د چاپېريالي ملي معلوماتي سيستم ښوونيز ورکشاپ پيل شو
د چاپېريال ساتنې ملي ادارې د مرکزي او ولايتي کارکوونو ته د چاپېريالي ملي معلوماتي سيستم په تړاو ښوونيز ورکشاپ چې يوه اونۍ به دوام وکړي، نن د روان کال د لړم د مياشتې په ۲۹ مه نېټه پرانېست.
د چاپېريال ساتنې ملي ادارې عمومي رئيس ښاغلي شاه زمان میوندي دې ورکشاپ کې د ولايتي کارکوونکو د ګډون په اړه خوښي څرګنده کړه او ويې ويل: د چاپېريالي ملي معلوماتي سيستم رامنځ ته کول يادې ادارې ته لويه لاسته راوړنه ده او په دې سيستم کې کولی شو چې د چاپېريالي معلوماتو سربېره غير چاپېريالي معلومات هم خوندي کړو.
ښاغلي ميوندي د کارکوونکو د ظرفيت لوړېدل، تشکيل ته بيا کتنه، د دفترونو تجهيزول، د معلوماتي سيستم رامنځ ته کول، د پرمختيايي بوديجې لګول او د خلکو د عامه پوهاوي د کچې لوړېدل يې د يادې له مهمو فعاليتونو څخه یاد کړل او ويې ويل چې د چاپېريال ساتنې ملي اداره په دې برخه کې د پام وړ پرمختګونه لري.
د چاپېريال ساتنې ملي ادارې عمومي رئيس د دې ورکشاپ له ټولو ګډونوالو څخه هیله وکړه ترڅو د دې سيستم د لا ښه والي لپاره خپلې طرحې او نظريات شريک کړي او هغه موضوعات چې د ورکشاپ به ترڅ کې يې زده کوي، اعظمي ګټه دې ترې واخلي.
د يادونې وړ ده چې یاد ورکشاپ به د معلوماتي ټکنالوژۍ د آمريت لخوا د يوې اونۍ لپاره دوام ولري، ترڅو د ادارې مرکزي او ولايتي کارکوونکي وشي کولی د دې سيستم د رامنځ ته کولو او د ګټې اخيستنې د څرنګوالي په تړاو اړين معلومات ترلاسه کړي.