وروستی
د چاپېريال ساتنې ملي ادارې عمومي رئيس د هسپانيا له سفير سره وکتل
د چاپېريال ساتنې ملي ادارې عمومي رئيس ښاغلي شاه زمان میوندي نن سهار د روان کال د لړم د میاشتې په ۲۹ مه نېټه په کابل کې د هسپانيا هېواد سفير ښاغلي Gabriel Ferran سره په خپل کاري دفتر کې وکتل.
په دې ناسته کې چې د چاپېریال ساتنې ملي ادارې د پاليسۍ او نړیوالو اړیکو معين، ښاغلي ادریس ملیار هم گډون درلود، دواړو اړخونو د ځینو چاپېریالي اړوندو موضوعاتو او همدارنګه د دواړو لورو پر همکاريو خبرې اترې وکړې.
د لیدنې په لړ کې د (COP 25) کلنۍ غونډې په تړاو هم بحث وشو، چې تمه ده د اقلیمي بدلون په اړه راتلونکې زېږدیزه میاشت کې د هسپانیا په پلازمېنه مادرید کې ترسره شي.
په افغانستان کې د هسپانیا لوړ پوړي ډيپلومات ژمنه وکړه؛ چې د دې سفر په اړه به له افغان پلاوي سره پوره همکاري کوي.
د لیدنې په بهیر کې د چاپېریال ساتنې ملي ادارې عمومي رئيس ټينګار وکړ چې موږ غواړو د اړوندو نړیوالو تجربو څخه په ګټې اخيستنې سره د راتلونکې لپاره د پالیسۍ جوړونې ترڅنګ د نورو چاپېريالي موضوعاتو په برخه کې هم ګټه واخلو.
ښاغلي Ferran د خپل هېواد په استازولۍ ژمنه وکړه، چې راتلونکې کې به د چاپېریال ساتنې اړوند بېلابېلو برخو کې همکاري کوي.
د چاپېريال ساتنې ملي ادارې عمومي رئيس د هسپانیا هېواد او په ټوله کې د اروپایي ټولنې له مرستو څخه د مننې ترڅنګ، هیله وښوده چې هسپانیا هېواد په راتلونکې کې هم د چاپېریالي چارو په اړه خپلو همکاريو ته دوام ورکړي.
خبریال: عبدالولي عابد
عکاس: سید امید سادات