وروستی
دوه وحشي پيشوګانې د ښکاریانو له منګولو خلاصې او په طبیعي ځایونو کې خوشې شوې
۱۴۴۷ کال د شعبان ۱۹نېټه/ ننګرهار-پکتیا
د ننګرهار او پکتیا ولایتونو د چاپېریال ساتنې ریاستونو له لوري د امنیتي ارګانونو په همکارۍ دوه وحشي پیشوګانې د ښکاریانو له منګولو خلاصې او په خپل اصلي چاپېریال کې خوشې شوې.
د ننګرهار ولایت د چپرهار ولسوالۍ په مربوطاتو کې یوه وحشي پیشو چې د احتمالي زیانونو د مخنیوي په موخه د سیمې د اوسېدونکو له لوري نیول شوې وه، د یادې ولسوالۍ له امنیتي ارګانونو سره تر همغږۍ وروسته د ننګرهار ولایت د چاپېریال ساتنې ریاست له لوري د یادې وحشي پیشو د روغتیايي وضعیت تر ارزونې وروسته، خپل اصلي طبیعي چاپېریال ته خوشې شوه.
همداراز د پکتيا ولايت د چاپېريال ساتنې رياست مسوولینو له لوري یوه وحشي پيشو چې دوه ورځې وړاندې د دریمې حوزې په ساحه کې د يو ملکي کس لخوا ښکار شوې، د استخباراتو رياست مسوولینو په همکارۍ یاده پیشو د مرکز ګردېز اړوند د بنو زويو په ساحه کې په آزاده فضا کې خپل طبيعي چاپېریال کې خوشې شوه.
د یادونې وړ ده چې د ریاستالوزرا عالي مقام د (۱۱۴) ګڼه حکم په اساس د وحشي ژوو، الوتونکو او کبانو ښکار بند دی. که هرچا له دې امر څخه سرغړونه وکړه، له قانوني چلند سره به مخ شي.