وروستی
د ډبرو سکرو لپاره د ستندرد جوړولو کمېټې غونډه وکړه
د مرغومي ۱۸مه- کابل
د چاپېریال ساتنې ملي ادارې مسلکي معین انجنیر عزت الله صدیقي په مشرۍ د هوا ککړتیا د راکمولو او مخنیوي په پار د بېړنیو اقداماتو په لړ کې د جدي په ۱۸مه نېټه د دې ادارې د بند امیر د غونډو په تالار کې د اړوند ادارو استازو په ګډون ناسته ترسره شوه.
په پیل کې ښاغلي صدیقي ګډونوالو ته ښه راغلاست ووایه او زیاته یې کړه: دې ورځو کې په فوق العاده توګه د هوا ککړتیا زیاته شوې ده چې د ډبرو سکاره یې له سترو عواملو ګڼل کیږي. ده وویل: جلالتمآب ولسمشر د ستندرد خپلواکې ادارې ته امر کړی چې د ډبرو سکرو د څرنګوالي معلومولو لپاره دې ملي ستندرد جوړ کړي؛ ترڅو وکولای شو چې په بازار کې د شته ډبرو سکرو کیفیت معلوم او د تطبیق جوګه وي.
ورپسې د ستندرد خپلواکې ادارې استازي خبرې وکړې او ویې ویل: د ډبرو سکرو د کیفیت معلومولو لپاره موږ شپږ نړیوال ستندردونه انتخاب کړي دي چې له دې جملې څخه باید د کمېټې غړي په بازارانو کې د شته ډبرو سکرو وضعیت په پام کې نیولو سره، یو یا څو دانې چې پر هغو د تطبیق وړ وي انتخاب کړي.
ګډونوالو هم د موضوع په تړاو بېلابېل نظرونه وړاندې کړل او ټینګار یې وکړ چې د ډبرو سکرو د څرنګوالي معلومولو لپاره باید داسې ستندر جوړ شي چې پر موجوده ذغالو د تطبیق وړ وي.
د ډبرو سکرو لپاره د ستندرد جوړول یوه پېچلې پروسه ده چې په دې تړاو به تخنیکي کمېټه چې په هغه کې د پوهنتون استادان، متخصصین او د چاپېریالي چارو کارپوهان ګډون لري، له هر اړخیزو علمي او تخنیکي څېړنو وروسته د ګډ تفاهم په ترڅ کې د ډبرو سکرو د کیفیت معلومولو لپاره ملي ستندرد جوړوي.
د یادولو وړ ده چې په بازارونو شته ذغال چې د تصفیه شویو په نوم پلورل کیږي په هېڅ ډول تصفیه نه دي، البته د یو ډول ساده پروسس طی کولو وروسته بازار ته وړاندې کیږي؛ د ډبرو سکرو تصفیه کېدل خورا پېچلې پروسه ده چې ډېر لګښت غواړي، په هغه کې باید د ډبرو سکاره میده شي، و وینځل شي او ټول مضره ګازونه یې د کیمیاوي موادو په وسیله له منځه یوړل شي.